Avropa İttifaqı (Aİ) Suriyaya qarşı bankçılıq, enerji və nəqliyyat kimi sektorları hədəf alan sanksiyaları dayandırıb.

Publika.az xəbər verir ki, bunu Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas bildirib.

“Biz tez hərəkət etməyi hədəfləyirik. Əgər Dəməşq administrasiyası tərəfindən yanlış addımlar atılarsa, biz sanksiyaların ləğvini geri qaytara bilərik”, - deyə açıqlamada qeyd olunub.

Bu açıqlama Suriya rəhbərliyinin atdığı demokratik addımların sanksiyaların gələcəyi üçün həlledici olacağını göstərir.

Qeyd edək ki, 2011-ci ildə vətəndaş müharibəsi başlayandan sonra Aİ Suriyaya qarşı sanksiyalar tətbiq edib. İlkin olaraq Suriya hökumətinə bağlı şəxslərə məhdudiyyətlər qoyulub. Bu çərçivədə insan hüquqlarının pozulmasına görə məsuliyyət daşıyan rejim mənsublarına qarşı səyahət qadağası və aktivlərin dondurulması kimi tədbirlər görülüb.