Amerika Birləşmiş Ştatlarının Azərbaycandakı keçmiş səfiri Metyu Brayza Globalinfo.az-a müsahibəsində bir çox maraqlı detala toxunub.

O, ABŞ Prezidenti Donald Trampın rəhbərliyi altında Vaşinqtonun hələ dəqiq xarici siyasət xəttinin formalaşmadığını, beləliklə yenidən İrana maksimum təzyiq göstərməkdən danışdığını bildirib. Brayzanın sözlərinə görə, Azərbaycanın İrandakı səfirliyini yenidən açması Trampın xoşuna gəlməyəcək.

Keçmiş səfir hər şeyə rəğmən yeni prezidentinin qərarlarının davamlı olmadığını, İranla bağlı siyasətin də dəyişməsinin mümkün ola biləcəyini deyib. Buna nümunə kimi ötən həftə Meksika və Kanadaya tətbiq edilən gömrük rüsumları ilə bağlı geri addımın atılmasını, müddətin uzadılmasını göstərib.

Beləliklə, Tramp İranla Azərbaycan arasında münasibətlərin normallaşmasının tərəfdarı deyil?

Globalinfo.az-a danışan politoloq Elxan Şahinoğlu deyib ki, Donald Trampın hələ prezident seçkisindən öncə də müəyyən siyasi dəsti-xətti var idi:

“Bununla belə o, seçildikdən sonra xarici siyasət və təhlükəsizlik kimi məsəllərdə korrektlər etmiş ola bilər. Məsələnin daha aydın başa düşülməsi üçün deyə bilərəm ki, Kanada, Qrenlandiya və Panama ilə bağlı dedikləri böyük ehtimalla öncədən planlanmışdı. İranla isə əvvəlkindən tamamilə fərqli düşüncələrin olduğu müşahidə edilir.

Tramp İrana təzyiq göstərmək, onu sıxışdırmaq istəyir. Lakin müharibə kimi bir hədəfinin olduğunu düşünmürəm. Ağ Ev rəhbəri, ümumiyyətlə, müharibədən çəkinməyə çalışır.

Lakin İsrail bu məsələdə ABŞ-la eyni düşüncədə deyil. Təl-Əviv Vaşinqtondan İranın strateji məntəqələrinə zərbələrin endirilməsini istəyir, bununla Tehranın nüvə silahı əldə etməməsinə çalışır”.

Politoloq bildirib ki, Bakıya bu mövzuda hansısa təzyiqin olması gözlənilən deyil:

“Azərbaycan artıq İrandakı səfirliyini bərpa edib. Ümumiyyətlə, orada bir çox ölkənin səfirliyi var. Yəni bu, təzyiq üçün əsasdırsa, onda Vaşinqton hamıya təzyiq etməlidir.

Vaşinqton Tehran məsələsində Bakı ilə ancaq dialoqa gedə bilər. Əgər İranı yaxşı öyrənmək istəyirsə, buna hazır olmalıdır”.