Prezident İlham Əliyev “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nı təsdiq edib. Dövlət Proqramının həyata keçirilməsinə dair Tədbirlər Planında yer alan məsələlərdən biri də təhsil müəssisələri ilə bağlıdır. Proqramda Bakı şəhərində yerləşən təhsil müəssisələrinin fəaliyyətinin şəhərin nəqliyyat sıxlığına təsirinin qiymətləndirilməsi və müvafiq təkliflərin hazırlanması qeyd olunub.

Maraqlıdır, universitetlərin şəhərətrafı ərazilərə köçürülməsi ilə yanaşı, distant təhsil də tətbiq oluna bilərmi?

Mövzu ilə bağlı Sfera.az-a açıqlama verən təhsil eksperti Ramin Nurəliyev bildirib ki, bəzi ixtisaslar üzrə artıq distant təhsilin bərpası Azərbaycanda mütləqdir.

Onun sözlərinə görə, distant təhsil formasının tətbiqi Bakıda nəqliyyatın sıxlığının aradan qaldırılması istiqamətində müəyyən təsiri ilə yanaşı, Azərbaycan təhsilinə də fayda göstərəcək.

Ekspert qeyd etdi ki, bəzi ixtisaslarda əyani tədrisi azaldaraq distant formata çevirmək olar:

“Bəzi ixtisaslarda isə distant təhsil forması mümkünsüzdür. Tibb, stomotologiya, bəzi mühəndislik, pedaqoji ixtisaslar üzrə distant təhsil forması doğru olmaz, amma kompüter yönümlü ixtisaslar, iqtisadiyyat, maliyyə, mühasibatlıq, tərcümə, psixologiya, beynəlxalq münasibətlər, regionşünaslıq və s kimi bir çox ixtisaslarda distant təhsil formasına başlaya bilərik”.