Son illər kağız pulların yavaş-yavaş dövriyyədən çıxdığının şahidi oluruq. Bəzi ölkələrdə artıq onlayn ödənişlərə üstünlük verilir. İsveç, Norveç kimi inkişaf etmiş Avropa ölkələrində pulların tədavüldən çıxdığını deyə bilərik. Dünya iqtisadiyyatı nağdsız ödənişə keçməyə hazırlaşır? Kağız pullar getdikcə dövriyyədən çıxarılacaq?

Globalinfo.az-a danışan iqtisadçı Natiq Cəfərlinin sözlərinə görə, dünya iqtisadiyyatı çoxdan nağdsız ödənişlərə keçib.

O deyib ki, buna baxmayaraq kağız pullar hər zaman olacaq:

“Elə ölkələr var ki, nağdsız ödənişlər az qala ümumi iqtisadi dövriyyənin 80-85 faizini təşkil edir. Məsələn, Avstraliya, Yeni Zelandiya kimi ölkələrdə belədir. Təbii ki, kağız pullar hər zaman olacaq. Amma nağdsız ödənişlərin həcmi artır. Onlayn bank xidmətlərinin həcmi, əhatə dairəsi genişləndikcə, nağdsız ödənişlərin də həcmi artmış olur. Bu isə təbii prosesdir”.

Xatırladaq ki, ABŞ-ın yeni prezidenti Donald Tramp vəzifəsinin icrasına başlayandan sonra Amerikanın milli valyutası olan dolların çöküş yaşayacağına dair davamlı proqnozlar verilir. Yaxın vaxtlarda daha çox kripto valyutanın, nağdsız hesablaşmaların üstünlük təşkil edəcəyi barədə əsaslandırılmalar edilir. Artıq dünya iqtisadiyyatında yeni dönəm başladığı, qarşıdakı illərdə insanları fərqli şərtlərin gözlədiyi barədə fikirlər eşidilir. Bu proqnozların əsaslı olub-olmadığı yaxın zamanlarda bilinəcək.