Ermənistan hökumətinin Avropa İttifaqına (Aİ) üzvlük prosesinin başlanması ilə bağlı qərar layihəsi parlamentdə təsdiq olunduqdan sonra referenduma çıxarılacaq. Bu, üzvlüyə yox, Qərbdən iqtisadi-siyasi və hərbi yardımlar almasına hesablanıb.

Teleqraf.com xəbər verir ki, bunu politoloq Məhəmməd Əsədullazadə deyib.

Analitikin fikrincə, İrəvan referendumla əhalinin səsini alsa belə, Aİ-yə üzv ola bilməyəcək:

“Çünki Ermənistanın Aİ ilə quru sərhədi olmalıdır, bu, Brüssel üçün əsas şərtlərdən biridir. Bunun üçün isə Türkiyə Avropa İttifaqına üzv olmalıdır. Yəni Ermənistanın üzvlüyü Türkiyədən asılıdır. Avropa İttifaqı isə illərdir müxtəlif bəhanələrlə Ankaranın üzvlüyünü əngəlləyir.

Ermənistan Türkiyə ilə normallaşma prosesini sürətləndirməyə çalışır. Ankara da əlaqələrin normallaşmasında maraqlıdır, amma bunun üçün Ermənistan və Azərbaycan arasında sülh müqaviləsi imzalanmalıdır. Ankara bu məqsədlə iki ölkə arasında sülh sazişinin bağlanması üçün çalışır. Türkiyənin geosiyasi hədəfi bölgədə Qafqaz Evi qurmaq və regionda mövqelərini daha da gücləndirməkdən ibarətdir. Bunun üçün də Azərbaycan və Ermənistan arasında sülh müqaviləsi bağlanmalıdır.

Türkiyə Cənubi Qafqazda siyasi sabitlik və sülhü təmin edə bilərsə, Avropa İttifaqına üzv ola bilər. Çünki beynəlxalq siyasi nizam dəyişir və Avropa İttifaqının cənub-şərq cinahı üçün Türkiyə kimi bir ölkəyə ehtiyacı yaranacaq. Əlavə edim ki, Türkiyəsiz Gürcüstanın da Aİ-yə üzvlüyü mümkün olmayacaqdı. Tiflis və Brüssel arasındakı son durum bunu tamamilə gündəmdən çıxarmış kimi görünür”.