Bəşər Əsəd rejiminin devrilməsindən sonra Suriyadakı mühüm hava və dəniz bazalarını boşaldan Rusiya hərbi qüvvələrini Liviyaya köçürür. İddialara görə, Moskva Liviyadakı qüvvələrinin sayını artırıb, həmçinin bölgəyə çoxlu sayda hərbi maşın və sursat göndərməyə başlayıb.

Publika.az “Haber Global”a istinadən xəbər verir ki, Rusiya Suriyadakı üç əsas hərbi bazasını - bir dəniz və iki hava bazasını geri çəkib.

Avropa və Amerika hərbi mənbələrinə görə, Rusiya sözügedən bazalarını bu dəfə Aralıq dənizində yerləşən Liviyada açmağı planlaşdırır.

Rusiyanın məqsədi

İddialara görə, Rusiya həm qlobal sərmayələrinin, həm də muzdlu hərbi şirkətin ən güclü olduğu Afrikada fəaliyyətini bu bazalar vasitəsilə həyata keçirmək istəyir.

ABŞ-da yerləşən “Defence News” nəşrinin məlumatına görə, sözügedən hərbi bazalar Liviyanın şərqinə nəzarət edən Xəlifə Haftarın nəzarəti altında olan bölgələrdə qurulacaq.

Pentaqon da bildirir ki, hazırda orada olan təxminən 2000 rus əsgəri ölkənin 10 bölgəsində hərbi əməliyyatlar aparır. Eyni zamanda Moskva Liviyaya çoxlu sayda “S-300” və “S-400” hava hücumundan müdafiə sistemi də göndərib.

Böyük təşviş

Aralıq dənizi hövzəsi ilə həmsərhəd olan NATO-ya üzv ölkələrdə, xüsusən də Fransa və İtaliyada çaxnaşma hökm sürür. Pentaqonun paylaşdığı məlumata görə, İtaliya Müdafiə Nazirliyi həyəcan vəziyyətindədir. Nazirlik hesab edir ki, Rusiyanın bölgədə quraşdırmağa başladığı hava hücumundan müdafiə sistemləri səbəbindən Avropanın bölgədəki əməliyyat qabiliyyəti xeyli zəifləyəcək. Fransa Müdafiə Nazirliyi Rusiya sualtı qayıqlarının Aralıq dənizinin dibində mülki və hərbi rabitə kabellərinə zərər vuracağından narahatdır.

Kritik ölkə Türkiyədir

NATO mənbələrinin məlumatına görə, Rusiya Liviyadakı mövcud hərbi bazalarından Sahel bölgəsindəki hərbi xunta rejimlərinə geniş silah və maliyyə dəstəyi göndərir. Xəlifə Haftarın qüvvələrinin bu bazalarda təlim keçdiyi və təchiz olunduğu da məlumdur. NATO mənbələrinin bildirdiyinə görə, Haftar hava bazalarının açılmasını bəyənsə də, Liviyada Rusiya hərbi-dəniz bazasının yaradılmasında maraqlı deyil.

Moskva həmçinin Suriya hökuməti ilə Latakiya dəniz bazasından istifadəni davam etdirmək üçün müvəqqəti saziş imzalamağa çalışır. Pentaqon rəsmiləri isə iddia edirlər ki, Rusiya hərbi-dəniz gəmilərindən bəziləri artıq Liviyaya doğru hərəkət edib. Həm Pentaqon, həm də NATO mənbələri bölgədə ən nüfuzlu ölkə olan Türkiyənin mövqeyinin və qəbul etdiyi qərarın kritik əhəmiyyət kəsb etdiyini qəbul edirlər.

ABŞ-ın razı salma cəhdləri

ABŞ-da yerləşən başqa bir müdafiə nəşri olan “The Defence Post” da iddia edib ki, Rusiya hərbi muzdluları Moskvanın müttəfiqi Belarus vasitəsilə Liviyaya yük daşımağa başlayıblar. ABŞ-ın keçən ildən bəri Xəlifə Haftarı Rusiya bazasına nəzarət etdiyi torpaqlarda yerləşdirməyə razı salmağa çalışdığını bildirən nəşr, Moskvanın Liviyadakı fəaliyyətini Suriyadakı kimi gizli saxlaya bilməyəcəyini də iddia edib.