Slovakiyanın Baş naziri Robert Fitso dekabrın 23-də Rusiyaya səfər edəcək.

Globalinfo.az xəbər verir ki, bunu Serbiya Prezidenti Aleksandr Vuçiç açıqlayıb.

“Mənə qeyri-rəsmi bəlli olub ki, Fitso bazar ertəsi Rusiya Prezidenti Vladimir Putinlə görüşəcək. Digər Avropa İttifaqı (Aİ) liderlərinin məsələyə nə reaksiya verəcəyini deyə bilmərəm. Bu situasiyanı daha da çətinləşdirir”, – Vuçiç bildirib.

Yerli mətbuat səfərin əsasən Rusiya qazının Ukraynadan tranzitinin yanvarın 1-dən etibarən dayandırılması ilə əlaqədar olduğunu yazıb. Ukrayna Prezidenti Volodimir Zelenski bundan öncə müqaviləni uzatmayacaqlarını və üçüncü tərəflərin bu qazı alıb ölkənin ərazisindən keçirməsinə icazə verməyəcəklərini qeyd edib.

Vuçiçin sözlərinə görə, Slovakiya hazırda qaz tədarükü ilə bağlı yaranan problemə görə çətin vəziyyətə düşüb.

Qeyd edək ki, R.Fitso daha əvvəl Ukraynadan tranzitin dayanmasının bütün Aİ üçün problem olacağını bildirib. İttifaq isə Rusiya qazı olmadan da yaşaya biləcəyini açıqlayıb.