Ermənistan Baş naziri Nikol Paşinyan ölkənin Konstitusiyası və Müstəqillik Bəyannaməsindəki preambulanın dəyişməsinə ehtiyac olmadığını bilirib.

Baş nazir Azərbaycanla sülh danışıqlarında iki məqamın razılaşdırılmadığını, bunlardan birinin Konstitusiyasının dəyişdirilməsi olduğunu deyib. Lakin Paşinyan Bakının tələbinə cavab olaraq sözügedən sənədlərdə heç bir ərazi iddiasının olmadığını qeyd edib. Onun bəyanatı ermənilərin gələcək müharibəyə hazırlığı kimi dəyərləndirilib. Çünki ölkənin Konstitusiyasının əsaslandığı Müstəqillik Bəyannaməsində Qarabağa iddialar yer alır. Bu, ermənilərin gələcəkdə revanşist məqsədlərlə Azərbaycana qarşı hücum üçün “hüquqi” əsası qorumağa çalışması kimi başa düşülür.

İrəvanın mövqeyi Bakını hansı tədbirlərə əl atmağa vadar edəcək? Müharibə, yaxud lokal hərbi toqquşma ola bilərmi?

Globalinfo.az-a danışan politoloq Turab Rzayev deyib ki, Paşinyanın açıqlaması Ermənistanla Azərbaycan arasında müharibəyə səbəb olmayacaq:

“Əlbəttə, bu bəyanat həm sülh prosesinə, həm də son zamanlar hiss olunan normallaşmaya təsir edəcək. Çünki vurğulanan məsələ Bakının ən mühüm şərti idi. İrəvan bu addımı ataraq faktiki olaraq etimad mühitini sarsıdır.

Nikol Paşinyan əvvəlcə Bakıdan vaxt istədi. Hətta 2026, ya da 2028-ci ilə qədər Konstitusiyanın dəyişməsi məsələsini həll edəcəyi ilə bağlı söz verdi. Azərbaycan isə bu təklifləri qəbul etmirdi. Baş nazirin hazırkı tutumu Bakının qərarının nə qədər doğru olduğunu bir daha göstərdi. Fikrimcə, 2026-cı ilə qədər gözləsəydik belə, yenə bugünkü cavabı alacaqdıq. İrəvanın təşəbbüsləri vaxt uzatmaqdan başqa bir şey deyildi.

Ermənistan Azərbaycanın əsas tələbini geri çevirdi. Bu, sülh danışıqlarını dalana dirəyəcək, nəticədə gərginlik arta bilər”.