İsrail ordusu İranın nüvə obyektlərinə zərbələr endirməyi nəzərdən keçirir. Belə bir fürsət Yaxın Şərqdə İranın proksi qüvvələrinin zəifləməsi və Suriyada Bəşər Əsəd rejiminin devrilməsindən sonra yaranıb.

Teleqraf.com xəbər verir ki, bu barədə “The Times of Israel” rəsmi mənbələrə istinadla yazır.

Nəşr bildirir ki, son gəlişmələr fonunda İsrail İrana bu cür potensial zərbələr endirmək üçün hazırlığını davam edir.

“İsrail Müdafiə Qüvvələri hesab edir ki, Əsəd rejiminin devrilməsi və Livanda əsas proksi qrupu “Hizbullah”ın zəifləməsindən sonra təcrid olunmuş İran nüvə proqramını inkişaf etdirə və nüvə silahı hazırlaya bilər”, - məqalədə deyilir.

İran nüvə silahı əldə etmək istəmədiyini iddia edir. Tehran bildirir ki, nüvə fəaliyyətləri sırf mülki məqsədlər güdür. Bununla belə, Atom Enerjisi üzrə Beynəlxalq Agentlik (AEBA) və ABŞ Tehranın hərbi nüvə proqramına malik olduğunu və onu “mülki fəaliyyət” adı altında inkişaf etdirməyə davam etdiyini bəyan edib.

İsrailin də fikrincə, İran nüvə silahı proqramından əl çəkməyib. Ölkənin bir çox nüvə obyektlərinin dağların altında yerləşdirildiyi bildirilir.