2025-ci ilin gəlməsinə saylı günlər qalır. İnsanları daha çox siyasi, hərbi, iqtisadi sahədə baş verə biləcək hadisələr maraqlandırır. Yeni ildə bizi nə gözləyir? Müharibə, devalvasiya, yoxsa sabitlik, sülh?

Globalinfo.az-a danışan iqtisadçı Elçin Qurbanov 2025-ci ildə devalvasiyanın gözlənilmədiyini deyib.

O, hökumətin lazımi addımlar atdığını vurğulayıb:

“Dünya bazarında Azərbaycan neftinin bareli üç gündür ki, bahalaşır. Belə ki, 0,83 faiz bahalaşaraq 76,54 ABŞ dollar təşkil edib. Devalvasiyanın olması üçün partlayış doğuran hadisə baş verməyib. Hazırda hökumət devalvasiyanın qarşısını ala biləcək ehtiyatlara və vasitələrə malikdir”.

Məsələnin siyasi tərəfini şərh edən siyasi şərhçi Yusif Bağırzadənin sözlərinə görə, 2025-ci ilin ilk siyasi hadisəsi sözsüz ki, bələdiyyə seçkiləri olacaq:

“Bu il ilk dəfə olaraq bələdiyyə seçkiləri 685 bələdiyyə vahidində keçiriləcək. Məlumdur ki, bu istiqamətdə qanunvericiliyə dəyişiklər edildi və kiçik bələdiyyələrin birləşdirilməsi yolu ilə bələdiyyələrin sayı azaldıldı. Bu məqam təbii ki, bələdiyyələrin işinə öz təsirini göstərəcək, problemlərin daha tez həlli üçün real imkanlar verəcək. Dünyada cərəyan edən siyasi proseslərin dolayısı ilə Azərbaycana da təsirlərini nəzərə alaraq demək olar ki, ABŞ-da Donald Trampın andiçməsindən sonra Ağ evin Cənubi Qafqaz siyasətində baş verə biləcək yanaşma da Azərbaycan-ABŞ münasibətlərində müsbət istiqamətdə dəyişikliklərə səbəb ola bilər”.

Y.Bağırzadə deyib ki, Türkiyənin sabiq XİN rəhbəri və ölkənin BMT yanında keçmiş daimi nümayəndəsi Feridun Sinirlioğlunun ATƏT-in yeni Baş katibi seçilməsi də 2025-ci ildə ATƏT və Azərbaycan arasında mövcud olan gərginliyin aradan qaldırılması üçün yeni imkanlar açır:

“Siyasi sahədə ən böyük gözlənti təbii ki, Azərbaycan və Ermənistan arasında aparılan danışıqlar prosesi ilə bağlıdır. Düşünürəm ki, yeni ilin ilk aylarında delimitasiya və demarkasiya prosesinin sürətlənməsi və hələ də anklavda olan kəndlərimizin geri qaytarılması ilə bağlı atılacaq addımlara da şahidlik edəcəyik”.

Siyasi şərhçi son olaraq onu da qeyd edib ki, hazırda istər dünyada, istərsə də regionda hadisələr elə sürətlə inkişaf edir ki, hər an yeni situasiyalarla üz-üzə qalmağımız mümkündür.

Hərbi ekspert Cəlil Xəlilov 2025-cildə üzləşəcəyimiz hərbi hadisələr haqda danışıb. O deyib ki, Azərbaycan ordusu dünya ölkələri sırasında 29-cu yerdədir:

“Ordumuzun gələn ilə olan planı genişmiqyaslıdır. Həm təlimlərin keçirilməsi, həm ordunun təminatı ilə bağlı yeniliklər olacaq, həm də orduda xidmət edən zabit və əsgərlərin sosial şəraitinin yaxşılaşdırılması gözlənilir. Bir sözlə, yenilənmə işləri baş tutacaq. Əsasən də ordunun yüksək hazırlığa malik olması, dünyada gedən proseslər və Ermənistanın silahlanması ilə bağlıdır. Bütün bunlar Azərbaycanı məcbur edir ki, o, daha yüksək hərbi gücə malik olsun. Ona görə də bu sahədə geniş işlər görülür”.

Hərbi ekspert deyib ki, ordunun gələcəkdə də güclənməsi üçün ölkə başçısının xüsusi tapşırıqları var:

“Ali Baş Komandanın xüsusi tapşırıqlarının həyata keçməsi üçün böyük işlər görüləcək. Bildiyiniz kimi, parlamentdə yaxın vaxtlarda büdcə ilə bağlı qərar təsdiq edildi. Ordu büdcəsinin təsdiqlənməsi onu göstərir ki, gələcəkdə böyük layihələr həyata keçiriləcək”.

C.Xəlilov 2025-ci ildə sülh müqaviləsinin imzalanması məsələsinə də toxunub:

“17 bənddən ibarət olan sülh müqaviləsinin demək olar ki, çoxu razılaşdırılıb. Bir-iki məqam qalıb. Fikrimcə, Ermənistan artıq addım atmalıdır. Onlar da qonşuluq münasibətlərini bərpa etmək, diplomatik, humanitar əlaqələr qurmaq istəyirlər. Eyni zamanda Ermənistan sülhə imza atmalıdır ki, Qafqazda dayanıqlı sülh yaransın, bir daha münaqişə olmasın”.