Polşa Prezidenti Andjey Dudanın Ermənistana səfəri müddətində Azərbaycanla sərhəd bölgəsinə, xüsusilə ermənilərin nəzarətində olan Kərki kəndinə yaxın əraziyə gəlməsi diqqət çəkib.

O, burada Avropa İttifaqının (Aİ) Ermənistandakı müşahidə missiyası ilə görüşüb. Polşa prezidenti missiyanın tərkibinin genişləndirilməsini təklif edib.

Aİ-nin missiyasının Ermənistandakı fəaliyyəti rəsmi olaraq 2025-ci ilin fevralın 19-da başa çatır. Lakin A.Dudanın səfəri və açıqlamaları bu müddətin uzadılacağına dair iddiaları gücləndirib.

Globalinfo.az-a danışan politoloq Ramiyə Məmmədova deyib ki, Aİ-nin ölkəmizə olan münasibəti qərəzlidir:

“Bir çox hallarda isə biz Brüsselin ikiüzlü siyasətinin şahidi oluruq. Məsələ ondadır ki, Aİ bir yandan Azərbaycanla əməkdaşlıqdan, enerji siyasətindən danışır, müsbət mesajlar verir, digər tərəfdən isə Bakını qıcıqlandıracaq addımlar atır. Məsələn, bu gün Avropa İttifaqının Ermənistandakı missiyasın fəaliyyəti, mandatı Bakı ilə razılaşdırılmayıb. Ona görə də biz bu fəaliyyəti ”Binokl diplomatiyası” adlandırırıq.

Aİ-ni narahat edən digər bir məqam isə, şübhəsiz, Bakının Brüsselin diktələri ilə hərəkət etməməsidir. Azərbaycanın müstəqil və balanslı siyasət yeritməsi ittifaqı qıcıqlandırır. Buna görə də regionda gərginliyi artırmaq və Bakını narahat etmək üçün missiyanın fəaliyyət müddətini artırmaq istəyir”.

Politoloq bildirib ki, Qərb İrəvanı hazırda ipli kukla kimi istifadə edir:

“Cənubi Qafqaz maraqları uğrunda Ermənisandan istifadə olunur. Azərbaycanla sülh prosesinin uzanması, vaxtaşırı gərginliyin yaranması da məhz Aİ-nin müdaxilələri ilə baş verir. Hesab edirəm ki, Avropa İttifaqının Ermənistandakı missiyası Andjey Dudanın səfəri fonunda fəaliyyət müddətini uzadacaq. Hətta kontingentin sayı artırıla da bilər. Lakin bu, regionda gərginliyin də artmasına səbəb olacaq”.