Qərb Cənubi Qafqazda vəziyyəti dəyişmək, yeni gərginlik yaratmaq üçün Ermənistanı silahlandırır. Ekspertlər iddia edir ki, Qərb, hətta İran, Hindistan vasitəsilə də İrəvanı yeni eskalasiyaya hazırlayır.

Avropa İttifaqının Ermənistana müdafiə yardımı ayırması, ABŞ-ın İrəvanla hərbi təlim keçirməsi də proseslərin nə qədər ciddi və narahatverici olduğunu göstərir.

Regionda yeni müharibə ehtimalı var? Ermənistan üzərindən region hansı dəhşətli plana hazırlanır?

Globalinfo.az-a danışan politoloq İlyas Hüseynov deyib ki, Ermənistanın silahlanması regionda təhlükəsizlik risklərini artırır:

“Bundan başqa, yeni təhdidlər də formalaşdırır. Çünki Ermənistanla Azərbaycan arasında sülh müqaviləsi imzalanmadıqca rəsmi İrəvanın silahlanması heç də suveren bir ölkənin öz təhlükəsizliyini gücləndirməsi kimi başa düşülə bilməz.

Ermənistan Müdafiə Nazirliyi hər dəfə deyir ki, silahlanma hər bir ölkənin suveren hüququdur. Lakin bir ölkə de-fakto müharibə vəziyyətindədirsə, onun silahlanması müharibə vəziyyətində olduğu ölkəyə yönəlib deməkdir. Bunu nə qədər gizləməyə çalışsan da nəticədə o silahlar digərinə yönələcək.

Biz yaxşı bilirik ki, Ermənistan 30 ilə yaxın Azərbaycan ərazilərini işğal edib. İşğal etdiyi ərazilərdə etnik, mədəni, ekoloji terror həyata keçirən İrəvan əraziləri minalayıb.

Azərbaycan müdafiə nazirliyi sonuncu bəyanatında sərt şəkildə Ermənistanı tənqid etdi. Eyni zamanda qeyd etmək lazımdır ki, Avropa İttifaqının Sülh Fondu da Ermənistana yardım ayırır, habelə, ABŞ Silahlı Qüvvələrin Ermənistanla birgə təlimlər keçirir. Bu açıq-aşkar regionda reallıqları dəyişməyə hesablanmış addımlardır. Nəticədə regionda sülh ritorikası arxa plana keçir, müharibə ehtimalı artır.

Qərb açıq şəkildə regionda yeni dəhşətli müharibə başlatmaq istəyir. Bu istiqamətdə İrəvana Qərb dəstək verir. Rəsmi Bakını narahat edənsə sadəcə sülhün pozulmasıdır. Əks təqdirdə müharibə Azərbaycanı qorxutmur”.