"Qərb Birləşmiş Millətlər Təşkilatının (BMT) bütün sanksiyalarını yenidən tətbiq etməklə təhdid etməyə davam edərsə, İran nüvə silahı əldə etmək üçün hərəkətə keçə bilər”.

Publika.az xəbər verir ki, bu sözləri İranın xarici işlər naziri Abbas Əraqçi Portuqaliyanın paytaxtı Lissabonda deyib.

Nazir İranın əvvəllər də nüvə silahı istehsal etmək qabiliyyətinə malik olduğunu, lakin bunun ölkənin təhlükəsizlik strategiyasının bir hissəsini təşkil etmədiyini bildirib:

“Avropa ölkələri BMT Təhlükəsizlik Şurasında İrana qarşı sanksiyaları yenidən tətbiq edərsə, İranda hamı əmin olacaq ki, nüvə silahı əldə etməmək doktrinası yanlışdır”.

Əraqçi Cenevrədə keçiriləcək İran və Avropa müzakirəçilərinin görüşünə toxunub:

"Əslində, bu görüş hazırkı vəziyyətdən çıxış yolunun olub-olmadığını öyrənmək üçündür. Mən bu görüşə nikbin baxmıram. Çünki İranın doğru tərəflə danışıb-danışmadığından əmin deyiləm. Avropa ölkələri, xüsusilə Britaniya, Almaniya və Fransa, deyəsən, itaətsizlik siyasətini seçiblər”.