İranın dini lideri Əli Xameneyi orduya İsrailin ölkəyə mümkün hücumuna cavab ssenariləri hazırlamaq təlimatı verib.

Teleqraf.com xəbər verir ki, bu barədə İsrailin “Yerusəlim Post” qəzeti məlumat yayıb.

İran İslam İnqilabı Keşikçiləri Korpusundan (SEPAH) bildirilib ki, İranın cavabı İsrailin hücumunun miqyasından asılı olacaq.

Nəşrin mənbələrinə görə, İsrail hücumu ancaq hərbi anbarlar və bazalarla məhdudlaşdırsa, Tehran cavab verməmək variantını seçə bilər:

“Bununla belə, əgər zərbə irimiqyaslı itki və dağıntılara səbəb olsa və ya İsrail nüvə, neft və ya enerji infrastrukturuna hücum etsə, İran buna cavab verəcək”.

YP yazır ki, bu durumda İran Yaxın Şərqdə, xüsusən də Bəsrə körfəzində enerji təchizatı və daşımaları hədəfə ala bilər.

İsrail İranın oktyabrın 1-də ballistik raket hücumuna cavab verəcəyini bəyan edib.