Ukraynanın yeni təyin olunmuş xarici işlər naziri Andrey Sibiqa Ukraynanın Gürcüstandakı müvəqqəti işlər vəkilinin geri çağırıldığını bəyan edib.

Publika.az “Gazeta.ru”-ya istinadən xəbər verir ki, orada səfirliyin fəaliyyətinə Mixail Xarışin rəhbərlik edib.

Sibiqa bunun səbəbini "müharibə şəraitində olan ölkədə diplomatiyanın reallıqlarından tam məlumatlı olmaması" kimi göstərib.

Nazir həmçinin Ukrayna səfirlərini və konsullarını mərkəzin göstərişlərini gözləməməyə və “proaktiv mövqe” tutmağa çağırıb.

Bu günlərdə hakim “Gürcü arzusu” partiyasının nümayəndələri bir sıra anti-Ukrayna bəyanatları ilə çıxış ediblər. Belə ki, ölkənin baş naziri İrakli Kobaxidze Kiyevi səfirinin Tbilisidən geri çağırılması ilə bağlı “qeyri-dost qərara” yenidən baxmağa çağırıb.

Bundan başqa, “Gürcü arzusu” Qərbin, Ukraynanın və gürcü müxalifətinin Gürcüstanı Rusiyaya qarşı müharibəyə cəlb etmək niyyətində olduğunu iddia edir, həmçinin Ukrayna sıralarında döyüşmüş respublika vətəndaşlarının iştirakı ilə çevriliş hazırladığını bəyan edir.