Ukrayna ordusunun Kursk əməliyyatı uzunmüddətli nəticələr verməyəcək qısamüddətli uğurdur.

Teleqraf.com xəbər verir ki, bu barədə “Foreign Policy” yazır.

“Ukraynanın Rusiyaya qarşı gözlənilməz əks-hücum əməliyyatı müharibədə kritik dönüş nöqtəsidir, mənasız tamaşadır, yoxsa Kiyevin strateji səhvidir? Qısa müddətdə uğurludur, amma orta və uzunmüddətli perspektiv vacibdir”, - məqalə müəllifləri deyirlər.

ABŞ nəşrinin fikrincə, Ukraynanın sürpriz əks-həmləsi Rusiyada çaşqınlıq yaratsa da, bunu davam etdirmək çətindir. Analitiklərə görə, döyüş meydanında əldə edilən bu uğurların müharibənin nəticələrinə təsir göstərməsi mümkün deyil.

“Kursk əməliyyatı Rusiya ilə müqayisədə Ukrayna üçün daha çox itkilərə səbəb ola bilər. Bu, Ukraynanın tab gətirə biləcəyi durum deyil. Belə nəticəyə gəlmək böyük səhv olardı ki, bu, Ukraynaya Donbas və ya Krımı geri almağa imkan verəcək”, - məqalədə qeyd olunur.

Vurğulanır ki, hər iki dövlətin durumu tam fərqlidir. Hər iki tərəf çoxlu hərbçi və texnika itirib, amma Ukraynanın ərazi itkiləri də böyükdür.

Ukrayna təxminən Rusiyanın 1200 kvadratkilometr ərazisini ələ keçirib. Bu, Rusiyanın ümumi ərazisinin 0.0064 faizini təşkil edir. Amma Rusiya hazırda Ukrayna ərazisinin təxminən 20 faizinə nəzarət edir, üstəgəl, ölkə əhalisinin 35 faizini öz evlərindən didərgin salıb.

“Kiyev zəbt etdiyi əraziləri saxlaya bilsə belə, bu, mümkün danışıqlarda ciddi sövdələşmə aləti olmayacaq”, - FP yazır.

Təhlildə bildirilir ki, Ukraynanın taleyini Kursk əməliyyatı yox, Ukraynada baş verənlər müəyyən edəcək. Analitiklərin fikrincə, əsas amillər tərəflərin döyüş meydanında fədakarlıq etməyə davam etmək istəyi və bacarığı, digər ölkələrin Kiyevə dəstəyinin səviyyəsi, eləcə də Rusiyanın işğal etdiyi Ukrayna ərazilərini tərk edib-etməməsi olacaq.

“Rusiyanın müharibədə dəfələrlə səhv addımlar atdığını, hətta ləng irəlilədiyini nəzərə alsaq, çətin ki, kimsə hələ də Rusiyanın Avropanın qalan hissəsi üçün ciddi hərbi təhlükə törətdiyinə inansın”, - analitiklər söyləyirlər.