NATO ölkələri Çindən gələn mümkün təhlükəyə qarşı çıxmaq üçün Sakit okeanda qüvvələr yaratmağa başlayıb. Bu barədə “Blumberq” məlumat yayıb.

“NATO yeni yerlərə hərbi gəmilər göndərməklə Sakit okeanın Qərbində mövcudluğunu artırır. Bu da alyansın regionda artan təsirindən narahat olan Çinlə münasibətlərin gərginləşməsinə səbəb ola bilər. İtaliyanın yeganə təyyarədaşıyan gəmisi “Cavour” bu yaxınlarda Sakit okean regionuna göndərilib. Britaniyanın HMS “Prins of Vels” təyyarədaşıyan gəmisi oraya 2025-ci ildə gələcək. Fransa da öz növbəsində bölgəyə özünün “Şarl de Qoll” təyyarədaşıyan gəmisini göndərmək niyyətindədir”, – məlumatda deyilir.

NATO-nun Sakit okeanda qüvvələr yaratması nə ilə bağlıdır? Çinin buna reaksiyası necə olacaq?

Globalinfo.az-a danışan politoloq Tural İsmayılov deyib ki, NATO Çinin son dövrlər artan fəallığından ciddi şəkildə narahatdır:

“Məsələ ondadır ki, hazırda NATO-nun ən böyük rəqibi Rusiyadır. Rəsmi Pekin isə son zamanlar Kremlə ciddi şəkildə yardım edir. Rusiyanın aldığı yardımlar isə birbaşa Ukrayna müharibəsinə sərf edilir. NATO bu prosesdən narahatdır.

NATO başa düşür ki, Çinə qarşı tədbir görməsə Rusiyanın güclənməsi qaçılmaz olacaq. Kreml isə bundan cəsarətlənib NATO-ya qarşı daha cəsarətli və riskli addımlar ata biləcək.

Çin uzun müddət idi ki, Rusiya-Ukrayna müharibəsini izləyir, gizli də olsa Rusiyaya dəstək verirdi. Son zamanlar bu dəstək açıq-aşkar edilir. NATO məhz buna görə indi Sakit okeanda qüvvələr yaratmağa başlayıb. İstisna deyil ki, bu qüvvələr Tayvana dəstək verəcək.

NATO-nun bu addımları şübhəsiz gərginliyi artıracaq. Pekin bu addımı cavabsız qoymayacaq. Bununla belə tərəflərin ehtimal bir hərbi toqquşma içərisində olması real deyil. Bundan sonra da NATO-Çin gərginliyinin şahidi olacağıq”.