“Hizbullah” və HƏMAS təşkilatının İran tərəfindən maliyyələşdirildiyi, həmçinin hərbi yardım edildiyi bilinən reallıqdır. Hər iki təşkilat İranın regional proksi qüvvələri hesab edilir.

Diqqətçəkən əsas məsələ isə “Hizbullah”ın İslam dininin şiə, HƏMAS-ın isə sünni etiqadında olmasıdır. Yəni məzhəb baxımdan HƏMAS-ın İrana yaxınlığı yoxdur.

O zaman HƏMAS-ı İrana nə bağlayır?

Globalinfo.az-a danışan siyasi şərhçi Kənan Novruzov deyib ki, İranla İsrail arasında münaqişə XX əsrin 40-cı illərindən etibarən davam edir:

“Bunun bir neçə səbəbi var. Detallara varmadan onu deyək ki, İran ilk vaxtlardan HƏMAS və “Hizbullah” qruplaşmalarından İsrailə qarşı istifadə edir. Doğrudur, “Hizbullah”dan fərqli olaraq HƏMAS-la İran arasında məzhəb yaxınlığı yoxdur. Buna baxmayaraq, az qala bir əsrdir ki, İran HƏMAS-a hərbi və siyasi dəstək verir.

İran HƏMAS vasitəsi ilə İsrailə qarşı proksi müharibə aparır. Bu gün baş verənlər də göstərir ki, əslində müəyyən mənada düzgün strategiya seçib. HƏMAS və “Hizbullah” İranı İsraillə birbaşa toqquşmadan qoruyur. Amma bu perspektiv məhduddur. Lakin gələcəkdə birbaşa toqquşma qaçılmaz ola bilər. Bunun işartıları artıq görünür”.