12-13 iyun tarixlərində Ermənistan silahlı qüvvələrinin bölmələri Azərbaycan Ordusunun Naxçıvan istiqamətində yerləşən mövqelərini bir neçə dəfə atıcı silahlardan atəşə tutub. Ordumuzun adekvat cavab tədbirləri görülüb.

Sülh və normallaşma prosesindən danışdığımız ərəfədə atılan bu addım gözlənilməz oldu.

Maraqlıdır, Paşinyanın sülh bəyanatları səsləndirdiyi bir vaxtda, delimitasiya, demarkasiya proseslərinin getdiyi ərəfədə Ermənistan nəyə nail olmaq istəyir?

Sülh və normallaşma prosesindən yayınma cəhdlərinin arxasında nə dayanıb? Atəşkəsin pozulması İranla Azərbaycanın birgə hərbi təlimlərinə cavab ola bilərmi?

Mövzu ilə bağlı Globalinfo.az-a danışan hərbi ekspert Ədalət Verdiyev deyib ki, Qazaxın 4 kəndi Azərbaycana geri qaytarıldıqdan sonra Ermənistanın həm iqtidar, həm də müxalifət nümayəndələri ölkəmizə qarşı ərazi iddiaları səsləndirirlər:

“Göyçə mahalının qubernatoru Karen Sərkisyanın səsləndirdiyi “Azərbaycan qoşunları 44 günlük müharibədən sonra Göyçə bölgəsi istiqamətində nəzarətə götürdüyü ərazilərdən geri çəkilməlidir” fikri buna bariz nümunədir. Ermənistan sülh prosesini pozaraq delimitasiya və demarkasiya prosesindən diqqəti yayındırmaq istəyir. Daha əvvəl baş verən fəlakətlərdən nəticə çıxartmayan Ermənistan Naxçıvan istiqamətində atəşkəsi pozmaqla yenidən lokal toqquşma yaratmağa çalışır. Lakin bu yol Ermənistana növbəti dəfə böyük itkilər vəd edəcək”.

Hərbi ekspertin sözlərinə görə, Ermənistanın atəşkəsi pozmasını geopolitik amillər və İranın Azərbaycanla birgə keçirdiyi hərbi təlimlərlə əlaqələndirmək doğru deyil:

“Ermənistan real potensialı ilə nə Azərbaycan, nə də İrana qarşı təsir və təzyiq mexanizmlərinə malikdir. Bu, sadəcə ölkə daxilində davam edən etiraz aksiyalarından diqqəti yayındırmaq məqsədi daşıyır. Rəsmi İrəvan 21 minlik fərari ordu ilə Azərbaycan əsgərinin həyat və sağlamlığına təhdid yaradır. Bunu aradan qaldırmaq silahlı qüvvələrimizin imkanları daxilindədir”.