“ABŞ Zəngəzur dəhlizinin açılması məsələsini Rusiyanın başının qarışıq olduğu hazırkı dövrdə sürətli şəkildə reallaşdırmaq istəyir”.

Globalinfo.az xəbər verir ki, bunu erməni politoloq Benyamin Matevosyan deyib.

Onun sözlərinə görə, Vaşinqtonun məqsədi Moskvanı dəhlizə nəzarət imkanlarından məhrum etməkdir.

Matevosyan ABŞ-ın “çətin güzəştlər” dedikdə məhz dəhlizin açılmasını nəzərdə tutduğunu bildirib:

“İlkin mərhələdə dəhlizə nəzarət “Frontex” şirkətinə tapşırılacaq. Lakin məsələ odur ki, hansısa beynəlxalq təşkilata dəhlizə nəzarətin verilməsi, onun Ermənistana bağlılığını şübhə altına qoyur. Böyük ehtimalla dəhliz mübahisəli əraziyə çevriləcək. Amerikalılar məhz bunu təklif edir. “Frontex”in (Avropalı müşahidəçilər) gəlməsi isə nəzarətin Ankara və Bakıya verilməsi deməkdir”.

O, Ermənistan hökumətinin artıq bu ssenariyə razılıq verdiyini deyib:

“Rəcəb Tayyib Ərdoğanın nə dediyini xatırlayın. O bildirdi ki, Zəngəzur dəhlizi açılacaq, sülh sənədi imzalanacaq və beləliklə Türkiyə sərhədi açacaq. Erməni tərəfi bu sözə heç bir reaksiya vermədi. Bu da o deməkdir ki, İrəvan bağlı qapılar arxasında dəhlizin verilməsinə razılaşıb. İndi bu prosesin legitimləşdirilməsi gedir”.