ABŞ Dövlət katibi Antoni Blinkenin təşəbbüsü və iştirakilə Azərbaycan xarici işlər naziri Ceyhun Bayramov və Ermənistan xarici işlər naziri Ararat Mirzoyan arasında NATO-nun 75 illiyinə həsr olunmuş Zirvə görüşü çərçivəsində Vaşinqtonda görüş baş tutdu. Görüşün nəticələri ilə bağlı müsbət fikirlər səslənir. Həmin görüşdə tərəflərin Azərbaycan və Ermənistanın sülh və dövlətlərarası münasibətlərin qurulması haqqında tarixi sazişin yekunlaşdırılması istiqamətində əldə olunmuş irəliləyişi qeyd edilib. Eyni zamanda bu istiqamətdə tərəflərin işi davam etdirməyə razılaşdığı açıqlanıb.

Mövzunu Teleqraf.com-a şərh edən Milli Məclisin VI çağırış deputatı Rasim Musabəyov bu kimi görüşlərin müsbət əhval-ruhiyyədə baş tutması fonunda yekunda hər hansı bir razılaşmanın əldə edilməməsinə diqqət çəkib.

“Bu kimi görüşlər əslində istiqaməti göstərir. Fakt odur ki, bu görüşdə də nəsə bir razılaşmaya imza atılmayıb. Həmçinin də elan edilməyib ki, harada buna imza atıla bilər”, - deyə o əlavə edib.

Millət vəkili hesab edir ki, bunu irəliyə atılmış addım kimi səciyyələndirənlər də var:

“Amma hər dəfə elə bu tendensiyaya toxunulur. Sözsüz ki, sülhlə bağlı Azərbaycanın şərtləri aydındır. Prezident İlham Əliyev də bəyan etdi ki, bu paraflana bilər. Tərəflər arasında uzun müddət müzakirə edilən sülh mətnini paraflamaq mümkündür. Bu o deməkdir ki, mətn ya qəbul edilir, ya da imtina olunur. Amma bunu daha dəyişmək olmur”.

Rasim Musabəyova görə, sülh mətni hazırda həmin səviyyəyə gəlib çıxıbsa, bunu paraflamaq olar:

“Amma bu heç də, o demək deyil ki, tərtəflər bütün məsələləri həll edib. İstisna edilmir ki, sülh mətni hansısa mərhələdə paraflansın. Ermənistan konstitusiyasının dəyişdirilməsi ilə bağlı məsələ mövcuddur. Bunun da həlli ilə bağlı fərqli yollar var. Çünki həmin müddəanın qeyd edildiyi müstəqillik aktını Ermənistan parlamenti öz qərarı ləğv edə bilər. Bununla da digər qanunlarından Qarabağın Ermənistana “birləşdirilməsi” ilə bağlı absurd iddialar da birdəfəlik silinər”.