Keçmiş qaçqın və məcburi köçkünlərə dədə-baba yurdlarında ev tikmək üçün imkan yaradılmalıdır. Dövlət Şəhərsalma və Arxitektura Komitəsinin təqdim etdiyi plan əsasında bu işlər görülə bilər. Şəhər və rayonların baş planına uyğun olaraq insanlara öz torpaqlarında evlərin tikməsinə icazə verilməlidir.

Bunu Teleqraf.com-a Milli Məclisin deputatı Vahid Əhmədov deyib.

O qeyd edib ki, həmin torpaqlarda özləri üçün ev tikmək, şərait qurmaq imkanına malik şəxslər var:

“Bu bölgələrdən olan şəxslərin çoxu Ağdam, Füzuli və digər azad edilmiş ərazilərdə ev tikmək niyyətində olduqlarını bildirib. Ona görə də, bu kimi işləri görməyə icazə vermək lazımdır. Ümumi plan əsasında şəxslərin özləri üçün fərdi evlər tikib yaşamasına razılıq olmalıdır”.

Deputat bildirib ki, keçmiş köçkünlərin ata-baba yurdlarında ev tikib yaşamaq istəkləri ilə bağlı çoxlu müraciətlər var:

“Artıq bu adamlar öz torpaqlarında şərait qurub yaşamaq istəyir. Buna da adi baxmaq lazımdır. Dövlət tərəfindən də buna müəyyən qədər şərait yaradılmalıdır”.

Vahid Əhmədov Rəqabət Məcəlləsinin qəbul edildiyini bu istiqamətdə qarşıda duran əsas vəzifələrin olduğunu söyləyib:

“Qanunun icrası ilə bağlı müəyyən məsələlər mövcuddur. Bunun üzərində iş gedir. Məcəllənin bir illik icrasının nəticəsinə uyğun onun necə işləməsinə qiymət vermək olar. Azərbaycanın daxili bazarında monopoliya, inhisarçılıq hallarının aradan qaldırılması, azad rəqabətin təmin olunub-olunmaması ilə bağlı analizlər aparıldıqdan sonra onun effektivliyini dəyərləndirə bilərik”.

Müəllif: Tapdıq Qurbanlı