Paşinyanı devirmək üçün dəfələrlə Rusiya tərəfindən cəhdlər edilib. Bu, əvvəlcə ictimai etirazlar səviyyəsində sınaqdan keçirildi. Ancaq artıq Rusiya da əmindir ki, onun müdafiə etdiyi 5-ci kolon, xüsusilə də revanşist qüvvələr, Qarabağ klanının rəhbərlik etdiyi siyasi güc mərkəzləri Ermənistanda ictimai nüfuzlarını çox ciddi şəkildə itiriblər. Çünki etiraz mitinqinə əgər 1500 nəfərdən artıq insan çıxarılmırsa, bu o deməkdir ki, yalnız həmin siyasi güc mərkəzlərinin üzvləri çərçivəsində bu etiraz mitinqi baş tutur. Yəni xalq prosesdə yoxdur. Bu da o deməkdir ki, bu yolla hökuməti devirmək mümkün olmayacaq.

Bunu Teleqraf.com-a açıqlamasında politoloq Natiq Miri deyib.

Onun sözlərinə görə, indiki vəziyyətdə Rusiya müəyyən iqtisadi məhdudiyyətlər yarada bilər:

“Əlbəttə, Ermənistana ciddi təsir edə bilərlər. Çünki erməni iqtisadiyyatının 70 faizə qədər Rusiya ilə əlaqəlidir. Bütün məhsulları Rusiya bazarında satılır. Ona görə də Kreml bu yöndə addımlar ata bilər. Ancaq bu da problemdir. Çünki Rusiya-Ukrayna müharibəsi kontekstində bu gün Moskvaya hava su kimi lazım olan bəzi cihazlar, çiplər var ki, bu çiplərin yerləşdiyi avadanlıqları Avropa Birliyi dövlətləri, ABŞ və digər ölkələrdən alıb, ikili ixrac vasitəsi ilə Rusiya ötürən əsas ölkələrdən biri Ermənistandır. Buna görə də iqtisadi, enerji həm də qaz təchizatı baxımından hələ ki, Rusiya Ermənistana məhdudiyyətlər yaratmır. Çünki əl əli yuyar, əl də üzü. Dolayısı ilə ortada görünməyən anlaşma var. Bu prinsipdən istifadə edərək qarşılıqlı maraqlar çərçivəsində fəaliyyət göstərirlər.

Ermənistan öz büdcəsini qanunsuz yolla doldurur, ümumi daxili məhsulun artması erməni iqtisadiyyatının güclənməsi anlamına gəlməməlidir. Bunlar hamısı ikili ixrac vasitəsi ilə ortalığa çıxmış süni rəqəmlərdir. Bu məsələ aradan qaldırıldığı təqdirdə Ermənistan yenə də acınacaqlı iqtisadi durumuna geri qayıdacaq. İndiki vəziyyətdə Rusiya yalnız ənənəvi üsulla, sui-qəsd vasitəsilə Nikol Paşinyanı aradan qaldırmağa çalışa bilər. Bu xüsusda da hələlik çətinliklər var. Çünki Paşinyan sadəcə erməni polisi və xüsusi xidmət orqanları tərəfindən qorunmur. Qərbin xüsusi xidmət orqanları, eyni zamanda ABŞ-nin Mərkəzi Kəşfiyyat İdarəsinin əməkdaşları da Nikolu qoruyur. Həm kəşfiyyat informasiyası, həm də fiziki qoruma ilə Nikol Paşinyanı ciddi şəkildə mühafizə edirlər. Ona görə də hələlik Rusiya-Ermənistan dueli yalnız sözdə baş verir.

Natiq Miri bildirib ki, Fransanın isə Ermənistanla durumu tam fərqlidir:

"Fransa Ermənistanı silahlandırmaqla ciddi şəkildə orda yerləşmək istəyir. Hətta gələcək perspektivdə Fransanın hərbi bazasının Ermənistanda yaradılması da mümkün ola bilər. Bu gediş gəlişlər müəyyən mənada Fransanın hazırlıq xarakterini daşıyır. Hərbi baza yaradılması və güc vasitəsilə Ermənistanda öz varlığını sürdürmək istəyən Fransa region üçün müəyyən təhlükələr vəd edir. Fransa regional ölkə deyil. Rusiya, İran, Türkiyədən fərqli olaraq Fransa regiondan çox uzaqda yerləşən dövlətdir. Buna görə istənilən bir çaxnaşma, toqquşmalar, yeni müharibə Fransaya o qədər təsir etməyəcək. Bu, Fransanın düşmənçilik siyasətidir. Fransanın varlığı, bütün regional dövlətlər üçün təhlükə vəd etməklə bərabər, bütövlükdə stabilliyi pozan, sülhə təhlükə törədən bir amilə çevrilib.

Almaniyanın isə mövqeyi tam ayrıdır. Azərbaycan Almaniyanın təşəbbüsü ilə görüşlərə ona görə razılıq verdi ki, Berlin tərəfsiz yanaşma modelini qəbul etdi. Ayrıca olaraq Berlin moderator rolunda çıxış etmədi. Almaniya biznes, maliyyə institutları vasitəsilə Cənubi Qafqazda fəaliyyət göstərmək istəyir. Bu da Cənubi Qafqaz ölkələrinin, həmçinin Azərbaycanın da maraqlarını ifadə edir. Azərbaycana alman biznesmenlərinin son gəlişi, prezident səviyyəsində qəbul olunması da bunu ortaya qoyur".

Müəllif: Əsəd Məmmədəliyev