Serbiyada seçkilərdə pozuntular olduğu iddiası ilə başlayan gərginlik getdikcə artır. Belqradda polis seçkilərin ləğvini tələb etmək üçün küçələrə çıxan minlərlə insana sərt müdaxilə etsə də, müxalifət nümayişləri davam etdirməkdə israrlıdır.

Publika.az xəbər verir ki, həm Avropa İttifaqı üzvlüyünə namizəd olan, həm də Rusiya ilə sıx əlaqələr saxlayan Balkan ölkəsi Serbiyada seçki debatları bitib-tükənmir. Beynəlxalq müşahidəçilərin ədalətli şəraitdə keçirilmədiyini bildirdikləri 17 dekabr seçkilərinin təkrarlanması tələbi ilə nümayişlər davam edir. Ötən gün paytaxt Belqradın meydanlarına toplaşan minlərlə insan bələdiyyə binasına basqın etmək istəyəndə, polisin sərt müdaxiləsi ilə qarşılaşıb. Serb polisi pəncərə və qapıları sındıraraq binaya daxil olmağa çalışan, “Oğru Vuçiç”, “Vuçiç Putindir” kimi şüarlar səsləndirən etirazçılardan ən azı 38 nəfəri saxlayıb.

Bu iddialar seçki komissiyasının binası qarşısında etirazlara səbəb olub. Müxalifət alyansının 7 üzvü seçkilərin ləğvi tələbi ilə aclıq aksiyasına başlayıb. Alyans həmçinin Avropa Birliyinə məktub göndərərək, "seçkilərin nəticələrinin tanınmaması və istintaqın açılmasını" tələb edib. Seçki prosesinin ədalətli keçdiyini iddia edən Vuçiç müxalifəti yalan danışmaqda ittiham edib. Etirazların xaricdən təxribatlarla törədildiyini Vuçiç nümayişçiləri “quldur” adlandırıb.

Rusiya Serbiyadakı gərginliyə görə Qərb ölkələrini günahlandırıb. Rusiya Xarici İşlər Nazirliyinin sözçüsü Mariya Zaxarova “RİA Novosti” dövlət xəbər agentliyinə deyib: “Kollektiv Qərbin ölkədə sabitliyi pozmaq cəhdləri göz qabağındadır”.

Ölkədə keçirilən seçkilərdən sonra verdiyi bəyanatda Avropa İttifaqı (Aİ) seçki prosesinin islahat tələb etdiyini bildirib və “Serbiyanın demokratik təsisatlarının düzgün işləməsinin Birliyə qoşulma prosesində kritik əhəmiyyətə malik olduğuna” işarə edib.

Aysel Şahmar