Azərbaycanlıların Ermənistana qayıtması gələcəkdə saatlı bombaya çevriləcək.

Publika.az xəbər verir ki, bu fikirləri “Sputnik Ermənistan”ın müxbiri ilə söhbətində siyasi strateq Vigen Akopyan deyib. O, Bakının hər iki tərəfin milli azlıqlarla bağlı şərtini nəzərdə tutaraq belə deyib. Söhbət ermənilərin Qarabağa, azərbaycanlıların isə Ermənistana qayıtmasından gedir.

"Bu, kifayət qədər həssas məsələdir ki, azərbaycanlılar bu məsələdə çoxdan mövqe tuturlar. Onlar 1980-ci illərin sonu və 1990-cı illərin əvvəllərində Ermənistanı tərk etmiş azərbaycanlıları geri qaytarmağa çalışırlar. Onların sayı, müxtəlif mənbələrə görə 300 minə çatır. Onlar çox gözəl başa düşürlər ki, bu, gələcəkdə Azərbaycanın şərti yumşaq gücü olacaq və Ermənistanın altına salınmış minaya çevriləcək”, - Akopyan qeyd edib.

Onun sözlərinə görə, fürsət yaranarsa, rəsmi Bakı azərbaycanlıların hüquqlarının və ya təhlükəsizliyinin qorunmadığını bəyan edəcək. Bunun əsasında həm Azərbaycan, həm də Türkiyə Ermənistan ərazisinə silahlı qüvvələr yeritmək üçün səbəb axtaracaq.

Politoloq əmindir ki, Azərbaycan Silahlı Qüvvələri Ermənistana daxil olsa, bir daha onu tərk etməyəcək.

"Azərbaycan, xüsusən də müharibədən sonra güzgü bənzətmələri prinsipini tətbiq edib, məsələn, Laçın dəhlizi varsa, Zəngəzur dəhlizi də olmalıdır. İndi qaçqınlardan söhbət gedir. Bu, son bəyanatın mesajıdır, - deyə politoloq qeyd edib.

“Azərbaycanlılar geri qayıtmağa hazırdırsa, o zaman ermənilər Azərbaycanda yaşamağa nə dərəcədə hazırdırlar?” sualına cavab olaraq Akopyan vurğulayıb ki, bəzi Qarabağ sakinləri öz evlərinə qayıtmağa hazır ola bilərlər, ancaq beynəlxalq və kifayət qədər möhkəm təminat əsasında. O, azərbaycanlı qaçqınlardan danışarkən onların bir çoxunun geri dönəcəyini, lakin güc baxımından təminat alacağını vurğulayıb.

Tural