HƏMAS-ın hərbi qanadı İzzəddin əl-Qəssam Briqadalarının sözçüsü Əbu Ubeydə daha əvvəl İsrailə əsirləri ancaq “mübadilə” yolu ilə geri ala biləcəklərini bildirdiklərini açıqlayıb.

Publika.az xəbər verir ki, o, yayımladığı videoda "Əqsa tufanı"nın 48-ci günündə İsrailə müqavimət göstərməyə davam etdiklərini deyib. Sahədəki irəliləyişləri və əldə edilən məhbus mübadiləsi razılaşmasını qiymətləndirən sözçü, hücumların başladığı 7 oktyabrdan bu yana 335 İsrail hərbi avtomobilini hədəf aldıqlarını və onlardan 33-nün son 72 saatda vurulduğunu açıqlayıb.

Son 3 gündə İsrail əsgərlərini hədəf alan hücumlar həyata keçirdiklərini bildirən Əbu Ubeydə, 21 noyabrda Qəzzanın şimalındakı Tivam bölgəsində İsrail əsgərlərini pusquya saldıqlarını və ən az 5 əsgəri öldürdüklərini qeyd edib.

İsrailin hərbi əməliyyatlarda humanitar fasilə və məhbus mübadiləsini qəbul etməsi ilə bağlı Əbu Ubeydə deyib:

"Biz quru əməliyyatı başlamazdan əvvəl bunu təklif etmişdik, lakin düşmən düşünürdü ki, hərbi güc tətbiq etməklə nəticəyə nail ola bilər. Biz bunu o zaman da demişdik, indi də deyirik: Siz əsirləri ancaq barter etməklə geri ala bilərsiniz".

İsrailin müharibənin müddətini uzatmaq üçün soyqırım, qırğınlar və kollektiv cəzaya arxalandığını və bundan başqa konkret hərbi hədəfinin olmadığını ifadə edən Əbu Ubeydə, “Hücumlar nə qədər uzun olsa da, buna hazırıq",- deyə bildirib.

O, öldürməkdən başqa bir iş görməyən İsrailin quru əməliyyatı planını "qələbəni tez elan etmək üçün hər şeyi məhv etmək, hər kəsi öldürmək və qırğınlar törətmək" üzərində qurduğunu, lakin bu planı puça çıxardıqlarını ifadə edib.

Nəzrin Cavadzadə