ABŞ dövlət katibi Entoni Blinken Prezident Co Bayden administrasiyasının Qəzza zolağında İsrail və HƏMAS arasındakı münaqişəyə yanaşmada Dövlət Departamenti ilə fikir ayrılıqlarının olduğunu etiraf edib.

Publika.az xəbər verir ki, bu barədə CNN Dövlət Departamentinin əməkdaşlarına göndərilən elektron poçta istinadən məlumat yayıb.

Yayımçı Blinkenin sözlərindən sitat gətirib: "Bölmədəki bəzi insanlar bizim qəbul etdiyimiz yanaşmalarla razılaşmaya bilər və ya daha yaxşı nə edə biləcəyimizə dair fikirləri ola bilər".

Onun sözlərinə görə, Vaşinqtonda bu fikir ayrılıqlarını müzakirə etmək üçün forumlar təşkil edilir və ABŞ-ın dünya üzrə nümayəndəliklərində “əlaqə və ideyalar” axtarmaq üçün “açıq müzakirələr” aparılır.

Məktubda Blinken həmçinin əlavə edib ki, fələstinli mülki əhalinin "əziyyətlərini azaltmaq" üçün "daha çox iş görülməlidir".

Bundan əvvəl “Axios” portalı Dövlət Departamentinin əməkdaşlarının Ağ Evdən Fələstin-İsrail münaqişəsinə yanaşmalarına yenidən baxmağı tələb edən və ABŞ prezidenti Co Baydeni baş verənlər barədə yalan məlumat yaymaqda ittiham edən məktub imzaladığını bildirmişdi. Memorandumu artıq Dövlət Departamentinin və USAİD-in Beynəlxalq İnkişaf Agentliyinin 100 əməkdaşı imzalayıb.

Tural