“Azərbaycan indiyədək Ukraynaya milyonlarla dollar dəyərində humanitar yardım göstərib, bəs Ermənistan nə edib?”

Teleqraf.com xəbər verir ki, bunu politoloq Elxan Şahinoğlu deyib.

Ekspert erməni mediasının Ukrayna-Azərbaycan əlaqələri ilə bağlı yanaşmasına diqqət çəkib:

“Ukrayna prezidenti yenə Azərbaycana minnətdarlığını bildirib” – bu, erməni saytlarının növbəti kinayəli başlığıdır. Yəni demək istəyirlər ki, axı Ermənistan Baş naziri Nikol Paşinyan Ukrayna Prezidenti Vladimir Zelenskinin əlini sıxdı, bunun fotolarını yaydı, həyat yoldaşı Anna Akopyanı Kiyevdə keçirilən konfransa göndərdi, Təhlükəsizlik Şurasının katibi Armen Qriqoryan Maltada Ukrayna ilə bağlı foruma qatıldı.

İrəvan bütün bunlara görə Kremllə münasibətləri daha da gərginləşdirməsinə rəğmən, Zelenski niyə azərbaycanlı həmkarı İlham Əliyevə minnətdar olub?

Bu cür başlıqları saytlarında yayınlayan ermənilər anlamaq istəmirlər ki, əl sıxmaqla, foto çəkdirməklə, konfransda iştirak etməklə iş bitmir, Ermənistan ağır vəziyyətdə olan Ukraynaya indiyənə qədər hansı yardımı edib? Azərbaycan Ukraynaya milyonlarla dollar dəyərində elektrik avadanlılqarı göndərib ki, qışda ukraynalılar istiliklə təmin olunsunlar. Yanacaq göndərib ki, təcili yardım və yanğınsöndürən maşınları çalışsınlar. Valideynlərini itirən ukraynalı uşaqlar Bakıya gətirilərək, istirahətləri və psixoloji reabilitasiyaları həyata keçirilib ki, normal həyata qayıda bilsinlər, proses bu gün də davam edir.

Ermənistan bunların heç birini etmədiyi halda Zelenski Ermənistana niyə minnətdar olmalıdır?”.

Müəllif: Mənsur Rəğbətoğlu