Qəzzada dinc əhaliyə qarşı törətdilən qətliamda minlərlə günahsız insan həyatını itirib. İsrailə və onun tərəfdarlarına dünyanın hər yerindən çox sərt reaksiyalar var. Daha bir reaksiya İspaniyanın Sosial Hüquqlar naziri və "Podemos" partiyasının lideri İone Belarradan gəlib.

Publika.az xəbər verir ki, Belarra Avropa ölkələrini İsraillə diplomatik əlaqələri kəsməyə, silah embarqosu və iqtisadi sanksiyalar tətbiq etməyə çağırıb.

O bildirib ki, hərəkətə keçmək vaxtıdır:

“Soyqırımı dayandırmaq hələ də mümkündür. Gəlin tədbir görək. Bu gün Netanyahunun İsraildə Birləşmiş Millətlər Təşkilatını persona-non-qrata elan etdiyini gördük. Bu o deməkdir ki, BMT rəsmiləri bu torpaqlara getmək üçün viza ala bilməyəcək. Bu, onilliklər ərzində Netanyahu və İsrail dövlətinin Fələstin torpaqlarını qanunsuz işğal etmək siyasətindən əl çəkməməsinin nəticəsidir”.

Avropa ölkələrini İsrailə qarşı hərəkətə keçməyə çağıran və onlardan 4 təcili qərar vermələrini xahiş edən İspaniyalı nazir əlavə edib ki, birincisi, İsraillə diplomatik əlaqələri kəsmələridir:

“İkincisi, Putinin yüksək səviyyəli məmurlarına edildiyi kimi, İsrail rəhbərlərinə də iqtisadi sanksiyalar tətbiq edilməlidir. Üçüncüsü, silah embarqosu həyata keçirilməlidir. Dördüncüsü, Ukrayna müharibəsində olduğu kimi Netanyahunu və mülki insanları bombalayan bütün digər siyasi liderləri Beynəlxalq Cinayət Məhkəməsinə çıxarmaq lazımdır”.

Aysel Şahmar