Rusiyanın muzdlu “Vaqner” qrupunun yaradıcısı Yevgeni Priqojinin ölümü dünya gündəmində qalmaqda davam edir. Priqojinin ölüb-ölmədiyi ilə bağlı bir çox iddialar səslənsə də, Rusiyadan verilən açıqlamalarda "Vaqner" liderinin ölümünün dəqiq olduğu bildirilib. Lidersiz qalan "Vaqner"in əməkdaşlarının gələcək tleyi ilə bağlı müzakirələr davam edərkən son anda Pentaqondan açıqlama gəlib.

Publika.az xəbər verir ki, Pentaqonun sözçüsü, briqada generalı Patrik Rayder bildirib ki, “Vaqner" qrupu mahiyyət etibarı ilə bitib”. Sözçü gündəlik mətbuat konfransında gündəmi dəyərləndirib və jurnalistlərin suallarını cavablandırıb. Konfransda bir jurnalist, keçən il Şimali Koreyanın "Vaqner"ə silah satdığına dair irəli sürülən iddiaları xatırladaraq, "Vaqner" ilə Şimali Koreya arasındakı silah müqaviləsinin bitdiyinə inanırsınızmı?" sualını verib. Priqojinin ölümünə toxunan Rayder, "Burada əsas məqam "Vaqner" qrupunun mahiyyətcə bitməsidir" deyib.

Ona görə də deyə bilərəm ki, heç bir danışıqlar yoxdur",- deyə açıqlayıb. "Vaqner"in bir müddətdir Rusiya-Ukrayna müharibəsində meydanda ən təsirli faktor olduğunu ifadə edən Rayder, "Rusiya İran və Şimali Koreya kimi zalım rejimlərdən sursat və ya silah almağa çalışır" ifadələrini işlədib. O Şimali Koreyanı Rusiyaya heç bir silah verməməyə çağırdığını təkrarlayıb.

Xatırladaq ki, Rusiya Federal Hava Nəqliyyatı Agentliyinin (Rosaviatsiya) avqustun 23-də verdiyi açıqlamada Priqojin də daxil olmaqla özəl təyyarənin Tverdə qəzaya uğraması nəticəsində 10 nəfərin öldüyü bildirilmişdi.

Açıqlamaya görə, təyyarədəki sərnişinlər siyahısında Priqojinin köməkçisi və "Vaqner"in yaradıcılarından biri Dmitri Utkin və Sergey Propustin, Yevgeni Makaryan, Aleksandr Totmin, Valeriy Cekalov, Nikolay Matuseyev yer alıb. Rusiya İstintaq Komitəsi avqustun 27-də yaydığı bəyanatda Tver vilayətində şəxsi təyyarənin qəzaya uğraması nəticəsində həlak olanlar arasında Yevgeni Priqojinin də olduğunu təsdiqləyib. Priqojinin dəfn mərasiminin avqustun 29-da Sankt-Peterburqdakı qəbiristanlıqda “ictimaiyyətə qapalı” şəkildə keçirilib.

Nəzrin