Prezident İlham Əliyevin Türkiyəyə, Rəcəb Tayyib Ərdoğanın isə Azərbaycana bu günə kimi səfərləri çox olub. Lakin Türkiyədə 13-cü Prezident seçkilərindən sonra Ərdoğanın ilk dövlət səfərini Azərbaycana etməsi çox tarixi bir hadisədir. Təsadüfi deyil ki, bu səfər Azərbaycan və Türkiyə ilə yanaşı dünyanın əksər ölkələrində də böyük diqqətlə izlənildi. Dünyanın bir çox dövlətlərinin gözü ötən gün Bakıda idi. Çünkü iki Türk liderinin Bakıdan verəcəkləri çox önəmli mesajların olacağını bütün dünya bilirdi.

Dünən gözlənildiyi kimi də oldu. Belə ki, paytaxt Bakıdan istər R.T.Ərdoğan, istərsə də Prezident İlham Əliyev həm Ermənistana, həm də onun hamilərini çox vacib mesajlar verdi, xəbərdarlıqlar etdilər. Bu mesajlar arasında xüsusilə diqqətçəkən məqamlardan biri Türkiyə dövlət başçısının "Şuşada Türkiyənin konsulluğunun açılmasını sürətləndirmək lazımdır" açıqlaması oldu. Bu bənd "Şuşa bəyannaməsində" də öz əksini tapır.

Təbii ki, Türkiyənin Şuşada konsulluq xidmətinin açılmasının Azərbaycan üçün strateji əməhiyyəti var. Bununla Azərbaycanın düşmənləri Türkiyənin Qarabağda varlığıyla üzləşəcəklər. Necə ki, bunu elə Ərdoğan özü də bəyan etdi: "İnşallah, Şuşadakı baş konsulluğumuz açılsa, bu, təbii ki, başda Ermənistan olmaqla bütün dünyaya ayrı bir mesaj olacaq".

Böyük ehtimalla artıq bu bəyanatın özü Türk düşmənlərinin canına vəlvələ salıb. Bunu ötən gün mövqelərimiz istiqamətində ermənilərin törətdikləri növbəti silahlı insidentlər də düşünməyə əsas verir. Belə ki, ötən gün Azərbaycan və Türkiyə liderlərinin istər Zəngəzur dəhlizinin açılmasının qaçılmaz olduğu, istərsə də Şuşada konsulluqla bağlı fikirlərinin ardından axşama doğru Şuşa və Naxçıvan istiqamətində mövqelərimizin intensiv atəşə tutulması hər şeyi deyir.

Əslində Naxçıvan istiqamətində mövqelərimizin intensiv atəşə tutulması tez-tez müşahidə edilən bir hadisə deyil. Ermənistan tərəfinin bu istiqamətdə birdən-birə fəallaşmasının səbəbi şübhəsiz ki, Türkiyə Prezidentinin "Zəngəzur dəhlizi ilə bağlı məsələləri sürətlə həll etməliyik", Prezident İlham Əliyevin isə "Zəngəzur dəhlizinin açılması qaçılmazdır" mesajları oldu. Məhz Şuşa və Naxçıvanın birdən-birə hədəf seçilməsindən belə aydın olur ki, Ermənistan və onun hamiləri artıq indidən Türk dünyasının iki liderinin Bakıdan ünvanlanan mesajlarından çox ciddi narahatlıq keçirməyə başlayıblar.

Söhbətin kimlərdən getdiyi hər kəsə məıumdur. Türkiyə prezidenti Zəngəzur dəhlizinin açılmasının bölgə ölkələri üçün vacib olduğunu bildirib. Azərbaycan da bu dəhlizin tezliklə işə düşməsini istəyir. Ancaq Ermənistan hakimiyyəti prosesi ləngidir. Rəsmi İrəvan yenə də kölə siyasətindən qurtula bilmir, himayədarlarının sifarişləri əsasında Azərbaycana güllə atmağa davam edir. Məlum məsələdir ki, İran da Fransa kimi Zəngəzur dəhlizinin açılmasında heç maraqlı deyil.

Lakin dünənki görüşdən çıxan nəticələrdən biri o oldu ki, Azərbaycan və Türkiyə birgə bundan da sonra qarşıya qoyduqları məqsədlərə nail olmaq üçün ciddi addımlar atmaq barədə düşünürlər. Görüşdə "Əminəm ki, gələcək illərdə bu birlik daha da güclənəcək və bizi yeni uğurlar, yeni qələbələr gözləyir" , - deyən Prezident İlham Əliyev bununla da türk ölkələri arasında inteqrasiyanın gücləndirilməsinin növbəti periodda Bakı və Ankara üçün əsas prioritet məsələlərdən biri kimi qarşıda dayandığını gizlətmədi. Türkiyə-Azərbaycan müttəfiqliyi və ittifaqı Türk Dünyasının nüvəsini təşkil etməkdədir, inteqrasiya gücləndikcə isə nəyinki digər türk dövlətləri üçün, başqa dövlətlər üçün də cazibəsinin artacağı heç istisna edilmir.

Yaxşı olar ki, Ermənistan üzərindən Azərbaycan və Türkiyəyə qarşı düşmənçilik siyasətini quran qüvvələr birdəfəlik anlasınlar ki, indi başqa bir dünya qurulur və bu dünyanın qurulmasında Türk Dövlətlərinin əhəmiyyəti sürətlə artır. Yaxşı olar ki, egional sülhə təhdid yaratmaq istəyən qüvvələr, bölgədə yeni eskalasiya hazırlamaq marağına düşən dövlətlər və Bakı ilə İrəvan arasında sülh danışıqlarını sabotaj etmək istəyən hərbi-siyasi rəhbərliklər bu oyundan artıq kənara çəkilsinlər. Çünkü əks təqdirdə bu təkcə Ermənistan üçün ağır nəticələrlə yekunlaşacaq kimi görünmür. İt də gedəcək, ip də...

Təhməz Əsədov
Trend