Amerikanın Müharibənin Tədqiqi İnstitutunun (ISW) analitikləri Rusiya prezidenti Vladimir Putinin Luqansk və Xerson vilayətlərinin işğal olunmuş ərazilərinə səfərini təhlil edərək, onun bu səfərlə bir neçə məqsəd güddüyünü bildiriblər.

Publika.az xəbər verir ki, ISW-nin məlumatına görə, Vladimir Putin işğal olunmuş Xerson və Luqansk vilayətlərinə səfəri zamanı Ukraynanın planlaşdırılan əks-hücum əməliyyatı ərəfəsində özünü hərbi lider kimi göstərməyə davam edib.

Kreml aprelin 18-də Putinin Rusiyanın “Dnepr” qoşun qrupunun Xerson vilayətindəki qərargahına və Luqansk vilayətində “Vostok” Milli Qvardiyasının qərargahlarına baş çəkdiyini açıqlayıb.

İnstitut qeyd edir ki, Ukrayna prezidenti Vladimir Zelenskinin aprelin 18-də Avdiyevkada cəbhə xəttinə səfəri olub və Kremlin Zelenskinin səfərinə media məkanında kölgə salmaq üçün qəsdən Putinin səfərinin görüntülərini yayması mümkündür.

Ekspertlər deyirlər ki, Putinin səfəri, həm də Ukraynanın planlaşdırılan əks-hücumları öncəsi potensial “günah keçiləri”ni aşkara çıxaracaq:

“Putin, Kremldəki mənbələr və hərbi bloqerlər Ukraynanın əks-hücumunun perspektivlərini getdikcə daha çox müzakirə edirlər və çox güman ki, Kreml daxili informasiya məkanını ya hərbi uğursuzluqlar, ya da əks-hücum təhlükəsini dəf etmək üçün hazırlayır”.

Bundan əlavə, icmalda deyilir ki, Putinin öz ordusunun liderləri ilə nümayişkaranə görüşləri çox güman ki, hərbi komandanlıqda və ola bilsin ki, Kremlin yaxın çevrəsindəki son dəyişiklikləri təsdiqləyir.

Həmçinin ehtimal edilir ki, Putin Lapini yenidən cəbhənin Luqansk sektoruna komandir təyin etməklə "Vaqner"in təsirini tarazlaşdırmağa çalışır.

Analitiklər “Qəzəbli Vətənpərvərlər Klubu”nun ayrı-ayrı üzvlərinin Kremlin müharibəni donduracağı və ya Ukrayna və Qərblə sülh danışıqlarına başlayacağı təqdirdə Rusiyada inqilabın tərəfdarı olduğuna diqqət çəkir.