“Fransa islamafobiya sahəsində ad çıxarıb və dünyada müsəlmanlara divan tutan ölkə kimi tanınır. İllər boyu islamafobiyaya türkəfobiyanı da əlavə edərək dünyanın müxtəlif nöqtələrində soyqırımı, insanlığa qarşı müxtəlif cinayətlər törədib. Xüsusilə də azı 1,5 milyon ərəbin öldürüldüyü 1935-1961-ci illər arasında Əlcəzairdə törətdikləri soyqırımı hadisələrini buna misal göstərmək olar. Təəssüf ki, dünya bunu soyqırımı kimi tanımaq üçün hərəkətə keçmir”.

Bunu Publika.az-a açıqlamasında politoloq Qabil Hüseynli deyib.

O bildirib ki, Fransanın vicdanına təkcə Əlcəzairdəki hadisələri deyil, həm də Tunisdə və digər Afrika ölkələrində həyata keçirdiyi repressiyaları, cəza tədbirlərini və böyük qanlı qırğınları da yazmaq lazımdır:

“Son dövrlər İslam dininin hörmətdən salınması istiqamətində prezident Emmanuel Makronun da müəyyən qatqıları var. Həyata keçirilən müxtəlif kampaniyalar özünü “mədəni” adlandıran bu ölkənin nə qədər islamafob olduğunu gözlər önünə sərir. Məhəmməd Peyğəmbərin karikaturalarının çəkilib yayılması, orta məktəblərdə İslam dininin problemli din olması yalanının aşılanması, xüsusilə onun tarix kitablarına salınması, ən başlıcası isə Türkiyə və Azərbaycanla bağlı türkəfob hərəkətləri Parisin konkret siyasətini açıq şəkildə göstərir. Fransa özünü sivilizasiyalı Avropa ölkəsi adlandırsa da, əslində, diqqət yetirdikdə bu ölkə müasir sivilizasiyadan, mədəniyətdən uzaq, millətlərarası ədavəti qızışdıran, millətlərarası münaqişələrdə tərəfsiz mövqe tutmayan bir dövlət kimi tanınır”.

Qabil Hüseynli qeyd edib ki, Fransa hakimiyyətinin Azərbaycana qarşı tutduğu qərəzli mövqenin kökündə dayanan məsələlərdən biri də məhz islamafob yanaşmadır:

“Fransanın, 30 il davam edən Ermənistanla Azərbaycan arasında olan münaqişənin nizama salınması üçün yaradılan ATƏT-in Minsk Qrupunun üç həmsədr ölkəsindən biri kimi sərgilədiyi ermənipərəst mövqe, indi isə sülhyaratma prosesində problemlərin həllinə çalışıldığı bir vaxtda həyata keçirdiyi açıq ermənipərəst siyasət bölgədə ədavətin qızışdırılmasında və sülhyaratma prosesinin əngəlləməsinə rəvac verir. Fransa Azərbaycan və Türkiyəyə, bütün Türk dünyasına qarşı sərgilədiyi siyasətlə təkcə islamafobiyası ilə deyil, türkəfobiya ilə də diqqət cəlb edir. Dünya tərəfindən bütün bunlara prinsipial qiymət verilməlidir”.

Qeyd edək ki, bu gün Bakıda “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda beynəlxalq konfrans işə başlayıb.