Almaniya və Böyük Britaniya Hərbi Hava Qüvvələri NATO mandatı çərçivəsində Baltikyanı ölkələrin hava məkanında birgə patrul xidməti həyata keçirəcək.

Publika.az xəbər verir ki, bu barədə DPA agentliyi Almaniya Müdafiə Nazirliyinə istinadla məlumat yayıb.

Agentlik aydınlaşdırıb ki, birgə patrul xidməti martın 6-da Estoniyada başlayacaq. Bu gündən etibarən hava patrulları qarışıq, yəni həm Almaniya, həm də Britaniya təyyarələrindən ibarət olacaq.

"Əsas vəzifə Rusiya hərbi təyyarələrini aşkar etmək və müşayiət etməkdir",- deyə nazirlik Baltikyanı respublikaların səmasında NATO missiyasının mahiyyətini izah edib.