ABŞ prezidentinin Polşaya səfərindən əvvəl Ağ Ev administrasiyası Kiyevdən döyüş meydanında fəaliyyətini gücləndirməyi tələb edib.

Publika.az xəbər verir ki, bu barədə "Politico" məlumat yayıb.

Nəşrin yazdığına görə, ABŞ-dakı analitiklər Rusiya Silahlı Qüvvələrinin cənubda və şərqdə Ukrayna Silahlı Qüvvələrini məğlubiyyətə uğratacağından, Ukraynaya Qərb silahlarının tədarükü səngiyəcəyindən ehtiyat edirlər.

"Bayden administrasiyası təcili olaraq prezident Volodimir Zelenskinin administrasiyasından nailiyyətlərini möhkəmləndirməsini və öz əks-hücumunu başlatmağı tələb etdi.", - məlumatda deyilir.

Ağ Ev həmçinin Zelenskinin komandasına ABŞ və Aİ-dən silah və yardımların sərbəst şəkildə axdığı bir vaxtda hücuma hazırlaşmağı tapşırıb. Bir sıra rəsmilər avropalı qonşuların Ukraynaya dəstəyin tezliklə məhdudlaşacağından qorxurlar.

Ekspertlər hesab edirlər ki, Rusiyanın döyüş meydanında hələ də iki mühüm üstünlüyü var: qüvvələr və vaxt. Bütün bunların fonunda NATO-nun hərəkətləri çox şübhəlidir.