Dondurulmuş Rusiya aktivləri Almaniyanın müttəfiqləri də eyni şeyi edərsə, Ukraynanı bərpa etmək üçün istifadə edilə bilər.

Publika.az xəbər verir ki, bu barədə "Bloomberg" mənbələrə istinadla məlumat yayıb.

Bildirilib ki, Almaniya hökuməti hələlik bu məsələ ilə bağlı konsensus əldə etməyib. Belə ki, ölkənin xarici işlər naziri Annalena Burbok təkid edir ki, Ukraynaya dəymiş ziyanı Rusiya ödəsin.

Almaniyanın maliyyə naziri Kristian Lindner Rusiya Bankının aktivlərinə həbs qoyulmasının təhlükəli presedent yarada biləcəyi fikrini bildirib. Almaniya kansleri Olaf Şolts israr edir ki, aktivlərin müsadirəsi müttəfiqlərlə razılaşdırılmalıdır.

Agentlik yazır ki, Almaniya eyni zamanda Ukraynadakı münaqişədə iştirakı sübuta yetirilən rusların aktivlərini müsadirə etmək istəyir.

Ancaq Almaniyada da belə fikirlər var ki, bir şəxsin münaqişədə iştirakını sübut edən məhkəmə prosesləri müsadirə prosesini illərlə uzada bilər.