Azərbaycanda iki aksiya gedir: biri Laçın yolunda, biri pytaxtın mərkəzində - Nizami küçəsi (Tarqovı);

Laçın yolunda 10 gündən artıqdır davam edən aksiya iştirakçıları milli maraqlarımız uğrunda mübarizə aparır;

“Tarqovı”da küçəyə çıxanlar Laçın yolunda xalq olaraq apardığımız mübarizəni dayandırmaq məqsədilə bütün vasitələrə əl atan ermənilərə - erməni maraqlarının müdafiəçilərinə “arqument siyahısı” hazırlayırlar;

Azərbaycana qarşı çoxvektorlu hücum planı yenidən dövriyyədədir və həmişə olduğu kimi indi də öz içimizdə olanlar maşa olaraq istifadə edilir.

Nə baş verir?

Bu gün kiçik bir qrup Nizami küçəsində (Tarqovı) Bəxtiyar Hacıyevin azadlığa buraxılması tələbi ilə aksiyaya cəhd etdi. B.Hacıyevin həbsinin motivlərini bir kənara qoyaq, burada diqqət edilməli məsələ aksiyaya cəhd edənlərin seçdikləri məkan və zamandır. Və hadisələri analiz etdikdə Hacıyevin də burada motiv olduğu, gerçəkdə bu aksiyanın Laçın yolunda keçirilən aksiyaya arxadan vurulan zərbədən başqa bir şey olmadığı aydın olur.

Azərbaycanlı fəalların Laçın yolunda 10 gündən çoxdur davam edən aksiyası Ermənistanın, Qarabağdakı separatçı-terrorçu rejimin, eləcə də erməni maraqlarının müdafiəçilərinin əl-qolunu bağladı. Azərbaycana qarşı olan bu qüvvələr faktiki heç nə edə bilmirlər və proseslərin inkişafında Laçın yolunda milli maraqlarımızı müdafiə edən QHT fəallarının tələblərini qəbul etdirəcəyi gözləntisi böyükdür. Buna nail olmaq Qarabağdakı separatçı-terrorçulara ciddi zərbə vuracaq, eləcə də Rusiya sülhməramlılarının müvəqqəti yerləşdiyi ərazilərdə Azərbaycan idarəçiliyinin önünün açılması imkanları yaradacaq. Şərtlər milli maraqlarımıza uyğundur.

Lakin Ermənistan və havadarları bütün vasitələrlə prosesin qarşısını almağa, aksiyanın dayandırılmasına nail olmağa çalışır.

Birincisi, beynəlxalq təşkilatları Qarabağda “humanitar fəlakət” yalanına inandırmağa çalışırlar;
İkincisi, havadarları vasitəsilə məsələ BMT də daxil olmaqla beynəlxalq strukturların müzakirəsinə çıxarırlar;
Üçüncüsü, Azərbaycanın Qarabağdakı erməni əhalisinin hüquqlarını pozduğu iddiasını tirajlayırlar;

Bu cəhdlər də nəticə vermir. Laçın yolundan bütün humanitar daşımaların keçidi rahat şəkildə həyata keçirilir. BMT də daxil olmaqla beynəlxalq strukturlar məsələni yalnız müzakirəyə çıxarıb çağırış edə bilirlər, lakin proseslərə müdaxilə üçün nə zəmin, nə də hüquqi əsas yoxdur. Qarabağdakı erməni əhalisi arasında isə artıq Azərbaycan cəmiyyətinə inteqrasiya haqda düşünənlərin sayı çoxalır. QHT-lərimizin yaratdığı “qaynar xətt”ə müraciətlərin artması da bunu təsdiqləyir.

Bütün bunların fonunda Ermənistan və havadarları klassik metodu işə salırlar: Azərbaycanda “insan haqları pozulur” görüntüləri yaratmaq;

Bu, beynəlxalq ictimaiyyətdə “İnsan haqlarını pozan Azərbaycan hakimiyyəti Qarabağdakı ermənilərin hüquq və təhlükəsizliyinə zəmanət verə bilməz” rəyini yaratmağa hesablanıb. Və bu işdə həmişəki kimi yenə Azərbaycan daxilində bəslədikləri şəbəkə dövriyəyə girir.

Bu gün paytaxtın mərkəzində Bəxtiyar Hacıyevlə bağlı keçirilən aksiya məhz bu oyunun tərkib hissəsidir və şübhəsiz ki, sifarişçilər erməni havadarlarıdır.

O da şübhəsizdir ki, bu aksiya dövlətə, millətə xəyanət, Laçın yolunda milli maraqlarımız uğrunda keçirilən aksiyaya Bakının mərkəzindən endirilən zərbədir. Lakin yolu xəyanət olanların qiymətini tarix də verəcək, xalq da.