ABŞ Ukraynaya “Patriot” zenit-raket komplekslərinin daxil olduğu 1,8 milyard dollar həcmində hərbi yardım göndərəcək.

Publika.az TASS informasiya agentliyinə istinadla xəbər verir ki, bu barədə ABŞ dövlət katibi Entoni Blinkenin yazılı bəyanatında bildirilib.

Məlumata görə, yardımın 1 milyardı ABŞ Dövlət Departamenti, 850 milyon dollar isə Pentaqon vasitəsilə ayrılacaq.

Həmçinin Ağ evin mətbuat xidməti ABŞ Prezidentinin Kiyevə 1 milyard dollar vəsaitin ayrılması haqqında sərəncamını dərc edib.

“Patriot”, müttəfiqlərin ukraynalılara təhvil verdiyi ən güclü və təkmil raket əleyhinə silahdır.

“Patriot” buraxılış qurğuları müxtəlif modifikasiyalı raketləri, o cümlədən 80 km-ə qədər məsafədə və 20 km yüksəklikdə hədəfləri vura bilən raketləri yükləyə bilir. Sistem səsdən yüksək sürətlə uçan hədəfləri məhv etmək üçün nəzərdə tutulub və eyni zamanda 125-ə qədər hədəfi izləyə və onlardan altısına raketləri yönəldə bilir.

Qeyd edək ki, Ukrayna uzun müddətdir və israrla Qərb müttəfiqlərindən ona "Patriot" kimi Rusiya raketlərinə qarşı güclü müdafiə vasitəsi vermələrini xahiş edib.