İtaliya Silahlı Qüvvələrinin arsenalında olan “Eurofighter” qırıcı təyyarəsi Siciliya adasının qərbində Marsala şəhəri yaxınlığında qəzaya uğrayıb.

Publika.az xəbər verir ki, İtaliya Silahlı Qüvvələrinin “Twitter” hesabında yazıldığına görə, pilot katapult etməyə müvəffəq olub. Hazırda onun axtarışları davam etdirilir.

Qeyd edilir ki, təyyarə Trapani-Birci hərbi aviabazasından təxminən 8 km cənub-şərqdə eniş edərkən qəzaya uğrayıb. Onun alovlu parçaları bir-birindən bir neçə yüz metr aralıda tapılıb.

Sonuncu nəsil “Eurofighter” qırıcısı İtaliya Hərbi Hava Qüvvələrinin bölmələrindən birində xidmətdə idi. Təyyarə digər NATO ölkələrinin sistemləri ilə inteqrasiya olunmuş radar, aviasiya və raket sistemləri sayəsində milli hava məkanının müşahidəsini və mühafizəsini təmin edir.