Hərbi ekspert Pavlo Narojni hesab edir ki, Ukraynanın İranın ballistik raketlərinə qarşı müdafiə vasitələri azdır, ona görə də onların Rusiyaya veriləcəyi təqdirdə, vəziyyət Kiyev üçün “çox pis” olacaq.

Publika.az UNİAN-a istinadla xəbər verir ki, ekspert bunun Ukrayna üçün o qədər də yaxşı xəbər olmadığını dilə gətirib:

“Çünki danışdığımız ballistik raketlər - onlardan qorunmaq vasitələrimiz azdır. Pentaqon və ya Almaniya bizə Patriot sistemləri versəydi, o zaman biz müdafiə olunardıq. Ən azı belə nöqtələrdə sistemlər quraşdırılacaqdı”.

Kiyevin İranın Rusiyaya hərbi raketlər, pilotsuz təyyarələr və s. ötürməməsi üçün ona necə təzyiq göstərə biləcəyindən danışan Narojni bunun neft ticarətinə qarşı sanksiyalara yenidən baxılması ilə edilə biləcəyini təklif edib.

“İranda əsas kart neft tədarüküdür. Tehran hazırda sanksiyalar altındadır, nefti ancaq digər ölkələrə tədarük edir. Əgər Amerika İrandan neft tədarükünə icazə versəydi, bu, elə bir kart ola bilərdi ki... Yəni, İranın Rusiya ilə əməkdaşlığını kəsməsi müqabilində İrana neft tədarük etməyə icazə vermək. İran uzun müddətdir ki, sanksiyalar altındadır. İranda hər şey pisdir. Onları sarsıdacaq başqa heç nə yoxdur”, - deyə ekspert bildirib.

Onun sözlərinə görə, “hərbi baxımdan” indi heç kim İranla döyüşməyəcək: “Başqa sözlə, Amerika İrana hücum etməyəcək. İsrail bunu hər zaman edir, lakin bu, İranı heç bir şəkildə dayandıra bilməyib. Ona görə də İranla bağlı vəziyyət bizim üçün çox pisdir”.