"İranın Rusiyaya ballistik raketlər tədarük etməsi ilə bağlı məlumatlar ortaya çıxandan sonra İsrail Ukraynaya hərbi yardım göstərməyə başlamalıdır".

Publika.az xəbər verir ki, bu barədə İsrailin diasporla iş üzrə naziri Naxman Şai öz "Twitter" səhifəsində yazıb.

"Bu səhər məlum oldu ki, İran Rusiyaya ballistik raketlər ötürür. Artıq İsrailin bu qanlı münaqişədə hansı mövqe tutacağına şübhə yoxdur. ABŞ və NATO ölkələri kimi Ukraynaya hərbi yardım göstərməyin vaxtı çatıb”, - israilli nazir yazıb.

Rusiya Federasiyasının Ukraynada xüsusi əməliyyatı başlayandan İsrail Kiyevə yalnız humanitar yardım və mülki fövqəladə hallar xidmətinin əməkdaşları üçün məhdud miqdarda qoruyucu vasitələr təqdim edir.

Bazar günü İsrailin dövlət televiziya və radio şirkəti CAN, "Washington Post" qəzetinə istinadla İranın Rusiyaya öz istehsalı olan ballistik raketlərin gözlənilən tədarükü barədə məlumat yayıb. Nəşr yazır ki, İran da Rusiyaya “əlavə” pilotsuz uçuş aparatları verməyə hazırlaşır.

Rusiya Xarici İşlər Nazirliyinin rəsmi nümayəndəsi Mariya Zaxarova Rusiyanın İrandan döyüş pilotsuz təyyarələri alması mövzusunun süni şəkildə Amerika mediasına atıldığını bəyan edib.