İranın Ali Rəhbərinin xarici siyasət üzrə müşaviri Əli Əkbər Vilayəti deyib ki, Azərbaycan Respublikası, xalqı gözümüzün işığıdır.

O, bu fikirlə də kifayətlənməyib. Ali dini lider Əli Xameneyinin “eşikağası” onu da söyləyib ki, “Azərbaycan, əgər hər hansı ölkənin hücumuna məruz qalarsa, İranı dəstək üçün öz yanında görəcək”.

Belə məqamda sual olunur ki, Azərbaycan 30 il Ermənistanın işğalına məruz qalarkən İran və onun vilayətiləri, xameneyiləri harada idi?

Suala cavab isə Azərbaycan Demokratik İslahatlar Partiyasının (ADİP) sədri, deputat Asim Mollazadədən gəlib.

Millət vəkili Publika.az-a açıqlamasında deyib ki, Əli Əkbər Vilayətinin bu fikirləri, əslində İranın mövcud siyasətinə bənzəyir:

“Yəni ancaq fikirlərdən ibarətdir və əmələ gələndə belə deyil. Mənə elə gəlir ki, Vilayətinin bu sözləri həqiqətdən çox-çox uzaqdır. İran, Azərbaycan ərazilərinin 30 illik işğalı dövründə qardaşı Ermənistanın yanında olub. Bundan sonrakı mərhələdə İran öz mənfi oyunlarını ört-basdır etməyə çalışacaq. Amma eyni mahiyyət yerində qalacaq. Yəni Tehranın baxışları dəyişməyəcək”.