“Naxçıvan uzun illər blokadada olub. Orada fərqli idarəçilik, prinsiplər var. Məsələn, Naxçıvandan Azərbaycana gələrkən gömrük xidməti təşkil edilib. Eləcə də Naxçıvanın özünün dövlət təhlükəsizliyi (artıq ləğv olundu), daxili işlər, müdafiə və digər nazirlikləri var. Bu da muxtar respublikadan daha çox Azərbaycanla konfederativ əlaqələri olan dövlət statusu kimi görünürdü. Açığı, mənə görə, bunun özü təhlükəlidir. Ermənilərin Naxçıvana iddiası fonunda bu, mərkəzi hökumətin zəifliyindən, təhlükələrdən, nəzəri baxımından başqa qüvvələrin əlinə keçə bilməsi imkanından xəbər verirdi. Ermənilərin Naxçıvana iddiası, təhlükəli oyunlar oynaması bu baxımdan diqqətə alınmalıdır. Odur ki, belə bir vaxtda Naxçıvanın mərkəzi hakimiyyətə ciddi tabe olması vacib və zəruridir”.

Bunu Teleqraf.com-a Azərbaycan Demokrat Partiyasının sədri Sərdar Cəlaloğlu son günlər Naxçıvanda baş verən struktur dəyişikliklərini şərh edərkən deyib.

Sərdar Cəlaloğlu əlavə edib ki, Zəngəzur dəhlizi açıldıqdan sonra Naxçıvan həm də ankılavdan çıxmış sayılacaq:

“Bu baxımdan da Naxçıvanın mərkəzi hökumətə ciddi şəkildə bağlanması vacib və zəruridir.

İkincisi, Zəngəzur dəhlizi açıldıqdan sonra Naxçıvana xüsusi statusun verilməsinə ehtiyac qalmır. Bu halda Türkiyə ilə danışaraq Naxçıvanın muxtar respublika statusunun ləğv edilməsi gündəmə gələ bilər. Yəni indi Naxçıvanda aparılan işlər qeyd etdiyim bu iki vəzifənin yerinə yetirilməsinə xidmət edir”.

ADP sədri əlavə edib ki, Naxçıvanla bağlı prosesin Qarabağın “statusu” üçün president olması baxımından həyata keçirilməsi məsələsi yoxdur:

“Nəzərə almaq lazımdır ki, Naxçıvanın muxtar statusu Türkiyənin razılığı ilə müəyyən edilmiş statusdur. Odur ki, Naxçıvanın statusu heç bir Azərbaycan ərazisi ilə müqayisə edilə bilməz. Dünyada çox nadir belə faktlar var ki, bir dövlətin qarantiyası ilə ərazi başqa dövlətə verilir. Naxçıvanın coğrafi mövqeyi zamanında nəzərə alınaraq bu qərar qəbul olunub. Ona görə də Naxçıvanın statusu qətiyyən başqa məsələlər üçün president təşkil edə bilməz. Dediyim kimi, Azərbaycan Türkiyə ilə razılaşıb Naxçıvanın statusunu aradan qaldıra bilər. Həm də Zəngəzur dəhlizi açıldıqdan sonra Azərbaycan Türkiyə ilə, eləcədə Naxçıvan Azərbaycanla birləşəcəyi üçün belə bir statusa qətiyyən ethiyac qalmayacaq. Naxçıvanın statusunun aradan qaldırılması Qars müqaviləsinə ziddiyyət təşkil etməyəcək, çünki bu məsələ Türkiyə ilə də razılaşdırılacaq”.