“Qarabağda Rusiya sülhməramlılarının mandatının genişləndirilməsi məsələsi hələ də açıqdır və Ermənistan və Azərbaycan arasında gələcək danışıqlardan asılıdır”.

KAİM.az TASS-a istinadla xəbər verir ki, bunu Rusiya Prezidenti Vladimir Putin bazar ertəsi jurnalistlərə bildirib.

“Sülhməramlılarla bağlı məsələyə gəlincə, bu, bizim 2020-ci ilin 10 noyabr tarixli, münaqişə bitəndə verilən birgə bəyanatda qeyd olunub. Burada əlavə ediləcək heç nə yoxdur. Biz bunu müzakirə etdik. Amma bunun üçün bizim birgə razılaşmamız lazımdır”, – o deyib.

Onun sözlərinə görə, mandatın uzadılması məsələsi digər məsələlərdən, o cümlədən sülh müqaviləsindən və Ermənistan-Azərbaycan sərhədinin delimitasiyasından asılıdır.

“Əgər o məsələlər həll olunarsa, o zaman sülhməramlılar məsələsi başqa məsələ olacaq. Əgər onlar həll olunmasa, yaxud qismən həll olunsa, bizim sülhməramlı kontingentimizin gələcəyi bundan asılı olacaq”, – deyən Rusiya lideri əlavə edib ki, Ermənistan və Azərbaycan Qarabağda gördüyü işlərə görə Rusiyaya öz təşəkkürlərini çatdırıblar. //Publika.az