Son günlər bölgələrdə dərs vəsaitlərinin çatışmazlığı yenidən gündəmə gəlib. İş o yerə çatıb ki, valideynlər dərs vəsaitlərinin bölgələrə gəlib çatmamasından gileylənir. Şikayətlərdən biri də odur ki, elektron vəsaitlər bölgələrdə əlçatan olsa da, ənənəvi vəsaitlərə daha çox ehtiyac duyulur. Bəs, problem nə vaxt həllini tapacaq? Elm və Təhsil Nazirliyi bununla bağlı hansı işləri görür?

Məsələ ilə bağlı adıçəkilən qurumla əlaqə saxladıq. Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov Publika.az-a açıqlamasında bildirdi ki, məsələ ilə bağlı nazirlik ciddi işlər görür:

“Ola bilsin ki, bəzi məktəblərdə problemlər qalır. Bu da yaxın günlərdə öz həllini tapacaq. Həmin məktəblərə elektron vəsaitlər, əlavə resurslar verilir. Bu problemin həlli bizim üçün əsas prioritetdir”.

Mövzuya təhsil eksperti Kamran Əsədov da münasibət bildirib. O qeyd edib ki, dərsliklərin çap edilməsi, onun məktəblərə paylanması Elm və Təhsil Nazirliyinin səlahiyyətindədir:

“Tədris sentyabrın 15-dən başlasa da, xüsusən yuxarı sinif dərsliklərinin böyük əksəriyyətinə nazirlik dərslik verə bilməyib. Hazırda ölkədə 4432 orta ümumtəhsil müəssisəsi fəaliyyət göstərir ki, onarda 1,6 milyon şagird təhsil alır. Təəssüflər olsun ki, Elm və Təhsil Nazirliyi öz üzərinə düşən öhdəliyi yerinə yetirib şagirdləri dərsliklərlə təmin edə bilmir. Prezident İlham Əliyevin 2004-cü ildə imzaladığı sərəncamla orta ümumtəhsil müəssisələrində təhsil alanlara dərsliklər pulsuz verilir və tədris ili başlayana qədər birmənalı şəkildə bütün şagirdlər dərslik komplekti ilə təmin olunur. Lakin nazirlik bu təlimatı unudub. Bu vaxta qədər belə hal olmamışdı, dərs ili ikinci aydır başlayıb, amma şagirdlərə dərsliklər verilməyib. Bu da tədrisin təşkilinə təsir edir, şagirdlərin zəruri biliklər əldə etməsinə mane olur.

Artıq məktəblərdə KSQ-BSQ hesablamaların vaxtıdır. Şagirdlərə kitab verməyən nazirlik onların qiymətləndirilməsini necə həyata keçirə bilər? Deyirlər ki, PDF elektron variantda var. Axı heç də bütün valideynlərin PDF-dən istifadə etmək imkanı yoxdur. Əgər dövlət dərsliklərin çapı üçün böyük məbləğdə pul ayırıbsa, belə çıxır ki, nazirlik həmin vəsaiti mənimsəyib, yerinə heç nə qoya bilmir. Dövlət tərəfindən dərsliklərin vaxtında çatdırılması təhsil siyasətində qeyd olunub və hər ilin avqustunda bununla bağlı xüsusi əmr olurdu, indi isə bu yoxdur. Təsəvvür edin, indi orta ümumtəhsil müəssisələrində yeni fənn təyin olunub - Təbiət fənni. Cədvəllərdə bu fənnin adı var, amma kitabı yoxdur. Daha bir məsələ: necə olur ki, bu kitabların hamısı satışda var, amma dövlət onu verə bilmir. Əlbəttə, dövlət pul ayırırsa, onu satışdan almaq imkanı var. Amma sabah Azərbaycanın ərazi bütövlüyünü qoruyacaq şagirdlərimiz, övladlarımız o kitabları əldə edə bilmir. Demək, bu məsələ Elm və Təhsil Nazirliyi üçün maraqlı deyil”.

K.Əsədov əlavə edib ki, Azərbaycanda dərsliklərə ayrılan vəsait kifayət qədər çoxdur:

“Təkcə dərsliklərin saxlanılmasına hər il 4 milyarddan çox pul ayrılır ki, bu da Gürcüstan və Ermənistanın büdcəsindən çoxdur. Amma Elm və Təhsil Nazirliyinin müvafiq şöbələri öz işinin öhdəsindən gələ bilmədiyi üçün bu gün şagirdlərimiz dərsliksiz dərslərə gedib gəlirlər. Bəs sonra onlar bir aylıq dərsləri haradan öyrənəcək? Regionlarda, dağlıq ərazilərdə yaşayan şagirdlərin vəziyyəti daha ağırdır”.