“Metronun konseptual inkişaf sxemi artıq təsdiq olunub. Həmin sxem hazırlanarkən Bakının inkişaf perspektivləri xüsusi öyrənilib, monitorinqlər aparılıb, sorğular keçirilib və əhalinin axın istiqamətləri araşdırılıb”.

Bunu “Bakı Metropoliteni” QSC-nin Mətbuat xidmətinin rəhbəri Bəxtiyar Məmmədov bildirib.

Sözçü əlavə edib ki, sxemə əsasən Binəqədidən başlayaraq Bibiheybət ərazisinə kimi metro xətti nəzərdə tutulub: “Bundan əlavə, mavi xəttin elektrik deposu Ramanı qəsəbəsində yerləşməklə Yeni Yasamala qədər gedib çıxacaq. Ən vacib prinsip budur ki, şəhərin mərkəzinin məskunlaşması zamanı dayanılan yerdən 700-1000 metr civarında hər istiqamətdə stansiyalar olacaq. Şəhərin ictimai nəqliyyatla təmin olunması optimal həllini tapacaq.

Bakının ətraf kənd və qəsəbələri dedikdə, metro stansiyanın inşasından əlavə, ictimai nəqliyyatın rahatlığı və əlçatanlığından söhbət getməlidir. Misal üçün, Koroğlu istiqamətində 3 stansiya inşa edildikdən sonra Maştağa, Zabrat və digər istiqamətlərə marşrut xətlərinin açılması da nəzərdə tutulur. Optimal edilmiş nəqliyyat deyildikdə bu nəzərdə tutulur.

Bakı kəndlərində yeni stansiyaların olub-olmaması növbəti gündəm məsələsinə çevrilə bilər. Bu da həmin ərazilərdə insanların zəruri ehtiyaclarından asılı olacaq. Bunlar hamısı mərhələli şəkildə uzunmüddətli planlardır. Bakının Baş Planı təsdiq olunduqdan sonra bu istiqamətdə geniş açıqlamalar olacaq”.