Sentyabrın 11-də İsveçdə parlament seçkisi keçiriləcək.

Publika.az xarici media portallarına istinadla bildirir ki, İsveçin 349 nəfərlik qanunverici orqanı proporsional üsulla (partiya siyahıları əsasında) formalaşır.

Məlumatda qeyd olunur ki, bu ölkədə keçirilən son rəy sorğularında hakim Sosial Demokrat Fəhlə Partiyasının 28,5 faiz səslə liderlik etdiyi üzə çıxıb.

Ultramillətçi baxışları ilə tanınan İsveç Demokratları Partiyası isə respondentlərin 20,1 faizinin dəstəyini qazanaraq ikinci yerə layiq görülüb.

Mötədil Koalisiya Partiyasını elektoratın 17,3 faizi, Mərkəz Partiyasını 7,8 faizi, Sol Partiyanı 7,4 faizi, Xristian Demokrat Partiyasını 6,6 faizi, Liberallar Partiyasını 5,8 faizi, Yaşıllar Partiyasını isə 4,8 faizi dəstəkləyir.

İsveçdə hökuməti qurmaqdan ötrü parlamentdə 175 mandat qazanmaq lazımdır.

Qeyd edək ki, hazırda ölkənin baş naziri sosial demokrat Maqdalena Anderssondur.