"Rusiya dözdü, siz isə uğursuz oldunuz".
AZXEBER.COM xarici mediaya istinadən xəbər verir ki, bu sözləri Rusiya prezidenti Vladimir Putin Qərb ölkələrinə mesaj olaraq göndərib.
O bildirib ki, Rusiya görünməmiş təzyiqlərə tab gətirib. Eyni zamanda o, öz ölkəsinin iqtisadi vəziyyətinin getdikcə stabilləşdiyini, rublun gücləndiyini bildirib.
Rusiya prezidenti Vladimir Putin Rusiya iqtisadiyyatı ilə bağlı hökumət rəsmiləri ilə keçirdiyi görüşdə Qərb ölkələrinin sanksiyalarla istədikləri məqsədlərinə çata bilməyəcəyini söyləyib. Həmçinin Putin Qərb ölkələrinin Rusiyanın bank sistemini çökdürmək və bazarlarda məhsul qıtlığı yaratmağı hədəflədiyini bildirib:
"Rusiyaya qarşı bu siyasətin nəticə vermədiyini deyə bilərik. Üstəlik, bu sanksiyalar onları tətbiq edənlərə ziyan vurur. İnflyasiya, işsizlik artır. ABŞ və Avropada iqtisadi vəziyyət pisləşir”.
Putin inflyasiyanın yüksək səviyyədə olduğunu qəbul edib:
"İllik inflyasiya 17,5 faizdir. Bunlar yüksək rəqəmlərdir. Vətəndaşlar bunu ailə büdcələrində hiss edir, qiymətlərin qalxdığını görürlər və biz bu inflyasiya ilə mübarizədə vətəndaşlara dəstək olmalıyıq".
Onu da qeyd edək ki, Putin qeyri-dost ölkələrin məhdudiyyətləri səbəbindən daxili bazarda kommersiya imkanlarının təsirləndiyini, ixrac və idxalda tədarükün daşınmasında və ödənişlərdə problemlər yarandığını vurğulayıb.