Türkiyənin Cümhuriyyət Xalq Partiyasının (CHP) İstanbuldan seçilən deputatı Mahmut Tanal Ukraynaya qarşı hərbi əməliyyat əmri verən Rusiya Prezidenti Vladimir Putin və baş nazir Mixail Mişustin, müdafiə naziri Sergey Şoyqu, xarici işlər naziri Sergey Lavrov, Baş Qərargah rəisi Valeri Gerasimov və digər məsul şəxslər haqqında “soyqırımı” ,“İnsanlığa qarşı cinayətlər”, “Beynəlxalq hüququn pozulması” maddələri ilə Ankara Baş Prokurorluğunda cinayət işinin qaldırılmasına çağırış edib.
KAİM.az xəbər verir ki, millət vəkili Mahmut Tanal Mediatürk TV-yə açıqlamasında bu müraciəti edərkən Türkiyə Cinayət Məcəlləsinin 76 və 77-ci maddələrini əsas götürdüyünü bildirib:
“Türkiyə Cinayət Məcəlləsinin 76 və 77-ci maddələrində soyqırımı və insalığa qarşı işlənən cinayətlər hər hansı din, irq və məzhəb fərqi əsas götürülərək insanlığa qarşı işlənən cinayət kimi göstərilir. Eyni zamanda mülki əhali yerləşən ərazilərin Cenevrə Konvensiyasının maddələrinə uyğun olaraq bombalanması, mülki əhalinin hədəf götürülməsi insanlığa qarşı cinayətdir”.
Türkiyəli deputatın sözlərinə görə, müharibənin də özünəxas qanunları var və bunlara əməl etmək lazımdır:
“Qanunlar bundan ibarətdir ki, sən ancaq özünümüdafiə məqsədilə müharibə edə bilərsən. İndi Ukraynada gedən müharibədə mülki əhaliyə – qadına, uşağa, yaşlıya hücum edildiyini görürük. Buna görə də Türkiyə Cinayət Məcəlləsinin 8-ci maddəsinə uyğun olaraq insanlığa qarşı işlənən cinayətlər və soyqırımı ilə bağlı məhkəmələrimiz səlahiyyətlidir. Elə bu məqsədlə mən şikayət etdim. Eyni zamanda Ermənistan Azərbaycana hücum edəndə eyni cinayətlərlə bağlı şikayət etmişdim”.
Millət vəkili qeyd edib ki, şikayətlə bağlı ölkə prokurorluğu təhqiqat mərhələsindədir: “Bu proses davam etməkdədir. Çünki hücum edilsə belə dürüstlüyə riayət etmək lazımdır. Savaşda qanunlara uyğun davranmaq lazımdır. Yəni, burada mülki əhaliyə qarşı işlənən güc qeyri-mütənasibdir. Savaş üçün səbəblər olmalıdır. Ancaq hazırkı müharibə haqsız səbəblər üzərində qurulub”.