Böyük Britaniyanın xarici işlər naziri Liz Truss Ukraynada döyüşmək istəyən vətəndaşlarını dəstəklədiyini açıqlayıb.

Gundem.az xeber verir ki, nazir bu bardədə BBC-yə açıqlamasında deyib. O, jurnalistin "Ukrayna Prezidenti Vladimir Zelenski xaricdən gələn insanların beynəlxalq qüvvəyə qoşulmasını istədi. Bunu dəstəkləyirsinizmi?" sualına belə cavab verib:

"Mən bunu dəstəkləyirəm. Təbii ki, bu, insanların özlərinin qərar verə biləcəyi bir şeydir. Ukrayna xalqı təkcə Ukraynaya görə deyil, bütün Avropa üçün azadlıq və demokratiya uğrunda mübarizə aparır. Çünki Putin məhz buna meydan oxuyur. Əgər insanlar bu mübarizəyə dəstək olmaq istəyirlərsə, bunu etmələri üçün onları dəstəkləyərəm".

Bunun ardınca müxbir ona "Yəni siz İngiltərədən Ukraynaya müharibədə kömək etmək üçün gedən insanları dəstəkləyirsiniz?" sualını ünvanlayıb. "Əgər onlar bunu etmək istəyirlərsə, əlbəttə ki", - deyə Truss cavab verib.

Qeyd edək ki, Vladimir Zelenski bütün dünya vətəndaşlarına səslənərək, Ukraynanı və Avropanı Rusiyaya qarşı qorumağa çağırıb.

Həmçinin, Rusiyanın Ukraynada hücumuna qarşı döyüşmək istəyən əcnəbi könüllülər üçün “Regional Müdafiə üzrə Beynəlxalq Legion” adlı bölmənin yaradılacağı açıqlanıb.

Bununla yanaşı, 2016-cı ildən Ukrayna ordusunda əcnəbilərin könüllü döyüşməsinə icazə verilib və “Ukraynanın regional müdafiəsi üzrə beynəlxalq legion” adlı əcnəbilərdən ibarət alt birliyi yaradılıb.Cebhe.info